શંખલા - છીપલાના બદલામાં ઢીંગલી

    છ વર્ષનો એક છોકરો તેની ચાર વર્ષની બહેન સાથે બજારમાં ચાલી રહ્યો હતો. તેણે જોયું કે બહેન થોડી પાછળ રહી ગઈ હતી. તે પણ થોભ્યો અને તેણે નોંધ્યું કે બહેન રમકડાંની એક દુકાન પાસે ઉભી રહી ગઈ હતી અને ભારે કુતૂહલ પૂર્વક અને ધ્યાનથી કંઈક જોઈ રહી હતી. 

    છોકરાએ તેની પાસે જઈ પૂછયું કે શું તેને કંઈ જોઈએ છે? છોકરીએ એક ઢીંગલી તરફ આંગળી ચીંધી. છોકરાએ એક જવાબદાર મોટા ભાઈ ની જેમ એ ઢીંગલી લીધી અને નાની બહેનના હાથમાં મૂકી દીધી. છોકરી તો રાજીના રેડ થઈ ગઈ. 

     દુકાનદાર આ બધું જોઈ રહ્યો હતો અને તેને આ નાનકડા છોકરાની મોટેરી ચેષ્ટા જોઈ ભારે આશ્ચર્ય થયું. ખુશી પણ થઈ. 

    હવે એ છોકરો દુકાનદાર પાસે આવ્યો અને તેણે દુકાનદારને પૂછયું, "કાકા, આ ઢીંગલી કેટલાની છે?" 

    દુકાનદાર એક ભલો આદમી હતો અને તેણે જીવનમાં અનેક તડકા-છાંયા જોયાં હતાં. તેણે પ્રેમ પૂર્વક છોકરાને સામો પ્રશ્ન કર્યો, "તું કેટલી કિંમત આપી શકીશ?" 

    છોકરાએ દરિયા કિનારેથી જમા કરેલા બધાં શંખલા - છીપલા પોતાના ખિસ્સામાંથી ખાલી કરી તે દુકાનદાર સમક્ષ ઢગલો કર્યા. દુકાનદારે જાણે પૈસાના સિક્કા ગણતો હોય એમ એ શંખલા - છીપલા એક એક કરી ગણવા માંડ્યા. ગણી રહ્યા બાદ તેણે છોકરા સામે જોયું. છોકરાએ ભારે નિર્દોષતા સાથે પૂછયું, " ઓછા છે?" 

   દુકાનદારે કહ્યું, "ના... ના...આ તો ઢીંગલીની કિંમત કરતાં વધારે છે. એટલે હું તને વધારાના છે એ પાછા આપીશ." આમ કહીને તેણે માત્ર ચાર છીપલા પોતાની પાસે રાખી બાકીનાં બધાં છોકરાને પાછા આપી દીધાં. 

   છોકરાએ તો ખુશી ખુશી પાછા મળેલા શંખલા - છીપલા પોતાના ખિસ્સામાં સેરવી દીધાં અને બહેનનો હાથ પકડી દુકાનમાંથી વિદાય લીધી. 

    દુકાનમાં કામ કરતા નોકરે પણ આ સમગ્ર ઘટના ક્રમ નિહાળ્યો અને છોકરાંઓના ગયા પછી દુકાનદારને પૂછયું, "સાહેબ, તમે શા માટે આટલી મોંઘી ઢીંગલી આ છોકરાઓને માત્ર ચાર છીપલા લઈને તેના બદલામાં આપી દીધી?" 

દુકાનદારે સ્મિત સાથે કહ્યું," ભાઈ, આપણાં માટે એ માત્ર મામૂલી શંખલા - છીપલા હશે, પણ એ નાના ભૂલકાઓ માટે એ ભારે કિંમતી છે. આ ઉંમરે એ છોકરાને પૈસાનું મૂલ્ય શું છે તેનો ખ્યાલ નહીં હોય, પણ એ મોટો થશે એટલે તે એને આપોઆપ સમજાઈ જશે. અને ત્યારે જ્યારે એને યાદ આવશે કે તેણે પોતાની નાની બહેન માટે ઢીંગલી પૈસા ને બદલે શંખલા - છીપલા આપીને ખરીદી હતી, એ વેળાએ તે વિચારશે કે વિશ્વ ઘણાં સારા લોકોથી ભરેલું છે. આથી તે એક હકારાત્મક અભિગમ કેળવી શકશે અને પોતે પણ સારો માણસ બની સારા કાર્યો કરવા પ્રેરાશે."

(ઇન્ટરનેટ પરથી)