કોરોનાની બીજી લહેર શરૂ થઈ છે તેવા ટાણે વોટ્સએપ પર વાંચવામાં આવેલો આ સંદેશ વ્યાજબી જણાય છે.
મારી દ્રષ્ટિએ આપણે જેને ચાહતા હોઈએ તેમની સાથે ઘરમાં રહેવાને આઈસોલેશન કે લોકડાઉન ગણવું જોઈએ નહીં.
આઈસોલેશન તો હોસ્પિટલમાં ગંભીર માંદગીને બિછાને પીડાતા દર્દી ભોગવે છે તેને કહેવાય.
મહેરબાની કરીને એમ કહેવાનું બંધ કરી દો કે તમે કંટાળી ગયા છો કારણ તમે ઘરની બહાર નીકળી શકતા નથી. હોસ્પિટલમાં લાંબા સમયથી સારવાર લઈ રહેલી વ્યક્તિને પૂછો તેને ઘેર જવાની કેટલી ઉત્કંઠા અને ઉતાવળ હોય છે.
ઈશ્વરનો પાડ માનો કે તમને ઘેર રહેવા મળે છે કારણ પૈસા સાથે કે પૈસા વગર, નોકરી સાથે કે નોકરી વગર, ઘેર હોવ ત્યારે તમે દુનિયાની શ્રેષ્ઠ જગા એ હોવ છો, તમને પ્રેમ કરતી વ્યક્તિ કે વ્યક્તિઓ સાથે!
કદાચ આ સમય છે તમારા ઘરને ધરમૂળથી પરિવર્તિત કરવાનો એવી અદ્ભુત જગામાં, જ્યાં શાંતિ હોય, યુદ્ધ કે કંકાસ નહીં ; જ્યાં આલિંગન હોય, અંતર નહીં.
તમે હાલ જે પરિસ્થિતિમાં છો તેને એક નવી દ્રષ્ટિએ નિહાળવાનો પ્રયત્ન કરો.
તમારા ઘરને પાર્ટી કરવાનું સ્થળ બનાવો - તેમાં સારું સંગીત સાંભળો, ગાઓ, નાચો...
તમારા ઘરને એક મંદિર બનાવો - તેમાં પ્રાર્થના કરો, ધ્યાન ધરો, પ્રશ્નો પૂછો, આભાર માનો, પ્રશંસા કરો, આજીજી કરો...
તમારા ઘરને એક શાળા બનાવો - તેમાં વાંચો, લખો, ચિત્રકામ કરો, રંગો, અભ્યાસ કરો, શીખો, શીખવો...
તમારા ઘરને એક દુકાન જેવું બનાવો - તેમાં સ્વચ્છતા જાળવો, ચીજ વસ્તુઓ વ્યવસ્થિત ગોઠવો, સુશોભન કરો, ચીજ વસ્તુઓને નામ આપો, તેમની જગા બદલો, નકામી ચીજ વસ્તુઓ વેચી દો કે તેમનું દાન કરો...
તમારા ઘરને એક સારી હોટલ બનાવો - તેમાં સારું સારું રાંધો, ખાઓ, નવા પ્રયાસો હાથ ધરો, નવી વાનગીઓ બનાવો, નવા મસાલા ચકાસો, નાનું કિચન ગાર્ડન બનાવો...
આ બધાં સાથે તમારા ઘરને તમારા પરિવાર સમું બનાવો - તેમાં પ્રેમથી ઘરનાં સૌ સભ્યો સાથે હસી ખુશી સાથે રહો... જીવનમાં આવી પડેલી આ તક નો શ્રેષ્ઠતમ ઉપયોગ કરી લો...
(ઈન્ટરનેટ પરથી)
No comments:
Post a Comment