'પીનટ્સ' (PeaNuts) નામની પ્રખ્યાત કોમિક સ્ટ્રીપના સર્જક ચાર્લ્સ શૂલ્ઝની ફિલોસોફી આજે ઇન્ટરનેટ કોર્નરમાં ચર્ચવી છે.
તમારે નીચેના પ્રશ્નોના ઉત્તર આપવાના નથી...તમારે માત્ર એ ધ્યાનથી વાંચી, મનન કરવાનું છે.
૧. દુનિયાની પાંચ સૌથી વધુ ધનવાન વ્યક્તિઓના નામ શું છે?
૨. છેલ્લા પાંચ મેગ્સેસે અવોર્ડ વિજેતા કોણ હતાં?
૩. મિસ ઇન્ડિયા સ્પર્ધાના છેલ્લા પાંચ વિજેતાઓના નામ કહો.
૪. દસ નોબેલ ઇનામ વિજેતાઓના નામ યાદ કરો.
૫. છેલ્લા પાંચ ઓસ્કાર વિજેતા અભિનેતા અને અભિનેત્રીઓના નામ જણાવો.
૬. છેલ્લા પાંચ અર્જુન એવોર્ડ વિજેતાઓના નામ કહો.
કેવું લાગ્યું? નામો આવડ્યા કે અતિ અઘરી લાગી આ ક્વીઝ?
મુદ્દો એ છે કે આપણામાંના મોટા ભાગનાઓને ગઈ કાલ ના છાપામાં હેડલાઈન શી હતી તે પણ યાદ રહેતું નથી.
ઉપરના પ્રશ્નોમાંની વ્યક્તિઓ કંઈ નાનીસૂની વ્યક્તિઓ નથી.તેઓ પોતપોતાના ક્ષેત્રની સિદ્ધહસ્ત મહાન હસ્તીઓ છે. પણ પ્રશંસા આખરે મરી પરવારે છે. પુરસ્કારો જીર્ણ થઈ જાય છે, ટ્રોફીઓને કાટ લાગી જાય છે. સિદ્ધીઓ ભૂલાઈ જાય છે. નામના અને પ્રશસ્તિપત્રો તેમના માલિકની હયાતિ સુધી જ મહત્વ ધરાવે છે.
હવે એક બીજી ક્વીઝ જોઇએ. તમે આ પ્રશ્નોના ઉત્તર કેટલી સહેલાઈથી આપી શકો છો તે નોંધો.
૧. તમારા શાળાજીવન દરમ્યાન જે શ્રેષ્ઠ શિક્ષકોએ તમને સારા માર્ક્સ મળે એ માટે ખૂબ સારું ભણાવ્યું અને તમને ગણાવ્યા અને પ્રગતિના પથ પર આગળ વધાર્યા એવા શિક્ષકોની યાદી તૈયાર કરો.
૨. મુશ્કેલીના સમયે મદદ કરી હોય તેવા તમારાં પાંચ મિત્રોના નામ કહો.
૩. તમે આજે જે કંઈ છો તે બનવા માટે તમને પ્રેરણા આપી હોય,તમને અર્થપૂર્ણ એવું કંઈક શિખવામાં મદદ કરી હોય તેવી પાંચ વ્યક્તિના નામ યાદ કરો.
૪. એવી પાંચ વ્યક્તિના નામ યાદ કરો જેણે તમને ખૂબ સારૂં મહેસૂસ કરાવ્યું હોય, તમારા પોતા માટે ખાસ લાગણીનો અનુભવ કરાવ્યો હોય.
૫. તમને જેની સાથે સમય પસાર કરવો પસંદ કરતાં હોવ તેવી પાંચ વ્યક્તિને યાદ કરો.
ઉપસંહાર : તમારા જીવનમાં પરિવર્તન લાવનાર,તમારાં માટે વિશેષ એવી વ્યક્તિઓ સિદ્ધહસ્ત,શ્રીમંત, પ્રખ્યાત,ઘણાં બધાં પુરસ્કારો કે પ્રશસ્તિપત્રો પ્રાપ્ત કર્યાં હોય વ્યક્તિઓ હોતી નથી.
આ વ્યક્તિઓ એ છે જેને તમારા માટે સાચી કાળજી છે,જે કોઈ જાતના સ્વાર્થ વગર સદાયે તમારી પડખે રહે છે.
જીવન સાચા અને સારા સંબંધોથી જ અર્થપૂર્ણ, સાર્થક બને છે. ભૌતિક વિશ્વ અને સંબંધોની ભેળસેળ કરશો નહિં.
('ઈન્ટરનેટ પરથી')
No comments:
Post a Comment