જાપાની વયસ્ક દ્વારા એક અતિ મહત્વનો પાઠ

એક ભારતીય જાપાન ગયો અને તેની આદત મુજબ ત્યાં ટ્રેનમાં મુસાફરી કરતી વેળાએ તેણે પોતાના પગ સામેની ખાલી બેઠક પર મૂક્યાં.ત્યાં એક અજબ ઘટના બની.એક વયસ્ક જાપાની તેની પાસે આવ્યા અને તેના પગ ઉપાડી પોતાના ખોળામાં લઈ બેસી ગયા. ભારતીય તો ડઘાઈ જ ગયો.

તેણે વયસ્કને પૂછ્યું ," મહોદય,આપ પોતાની બેઠક છોડી શા માટે અહિ આવી બેસી ગયા અને આ રીતે મારા પગ તમે તમારા ખોળામાં લઈ લીધા?"

વયસ્કે જવાબ આપ્યો,"શ્રીમાન, તમે અમારી જાહેર સંપત્તિનો દુરૂપયોગ કરી અમારૂં અપમાન કર્યું છે. મને તમારા પર આ બદલ અતિ ક્રોધ આવ્યો.પણ તમે અમારા દેશમાં મહેમાન છો. આથી હું તમારૂં જાહેરમાં અપમાન કરી શકું નહિ. તમે જે બસ કે ટ્રેનમાં પ્રવાસ કરતા હોવ ત્યાં સામેની બેઠક પર પગ મૂકવા ટેવાયેલા છો. અને હું મારા દેશની જાહેર સંપત્તિનો દુરૂપયોગ થતો જોઈ શક્યો નહિ. આથી અમારી જાહેર સંપત્તિને બચાવવા અને સાથે જ અમારા મહેમાનને કોઈ પ્રકારની અસુવિધા ન થાય એ હેતુથી મેં તમારા પગ લઈ મારા ખોળામાં મૂકી દીધા."

ભારતીયનું માથુ શરમથી નીચું ઝૂકી ગયું અને તેણે તરત જાપાની વયસ્કની માફી માગી.

જાપાની વયસ્કે કહ્યું,"અમે અમારી સરકારી સંપત્તિને અમારી પોતાની સંપત્તિ જ ગણીએ છીએ કારણ એ જાહેર જનતાના પૈસામાંથી જ તો બનાવાઈ હોય છે.અમે અમને સરકાર દ્વારા પૂરી પાડવામાં આવતી સુવિધાઓનો આદર કરીએ છીએ અને તેનો દુરુપયોગ ન કરતા તેનું જતન કરીએ છીએ.  જો તમે આ સારી આદત કેળવશો તો તમારે બીજા દેશોની મુલાકાતે જાવ ત્યારે ત્યાં અપમાનિત નહિ થવું પડે."

જાપાની વયસ્કે આ હળવા ચાબખા દ્વારા ભારતીયને એક અતિ મહત્વનો પાઠ શિખવી દીધો જે આપણે દરેક ભારતીયએ શિખવા જેવો છે.

('ઈન્ટરનેટ પરથી')