હકારાત્મક અભિગમ

     એક ઘર પાસે ઘણાં દિવસથી એક મોટું મકાન બાંધવા નું કામ ચાલુ હતું. ત્યાં રોજ મજુરો નાં નાનાં નાનાં બાળકો એક બીજાનું ખમીસ પકડી છુક છુક ગાડી ની રમત રમતાં. 

     રોજ કોઈક બાળક એન્જીન બનતો અને બાકીના બાળકો ડબ્બા બની તેની પાછળ દોડતાં. એન્જીન અને ડબ્બા રોજ બદલાતા રહેતાં. પણ...
    માત્ર ચડ્ડી પહેરેલો એક નાનકડો છોકરો હાથમાં કપડું ફેરવતાં રોજ ગાર્ડ બનતો.
        એક દિવસ મેં જોયું કે એ બાળકો ને રોજ રમતાં જોતી એક વ્યક્તિએ ગાર્ડ બનતા બાળક ને પોતાની પાસે બોલાવી પૂછ્યું 'બેટા, તુ રોજે રોજ ગાર્ડ બને છે. તને ક્યારેય એન્જીન કે કોઈ ડબ્બો બનવાનું મન નથી થતું?'
         એ બાળકે જવાબ આપ્યો' સાહેબ, મારી પાસે પહેરવા ખમીસ નથી એટલે હું એન્જીન કે ડબ્બો બનું તો મારી પાછળ વાળો છોકરો મને પકડે કઈ રીતે? મારી પાછળ ઉભા રહેવા કોઈ તૈયાર નહી થાય. એટલે રમત માં સામેલ થવા હું રોજ ગાર્ડ બની જાઉં છું.' 

     એ બાળક મને જીવન નો એક મોટો પાઠ શીખવી ગયો.
       આપણું જીવન ક્યારેય સંપૂર્ણ નથી હોતું, એમાં કોઈ ને કોઈ ખામી જરૂર હોય છે.
        પેલો બાળક માબાપ પર ગુસ્સો કરી રોઈ - રિસાઈ એક ખૂણે બેસી શકતો હતો પણ એમ ન કરતાં તેણે પરિસ્થિતી સાથે સમાધાન કરી પોતાની સમસ્યા નો ઉકેલ શોધી કાઢ્યો.
આપણે સૌ કેટલાં રોદણાં રડીએ છીએ :
    ક્યારેક પોતાના શ્યામ વર્ણ ને લીધે, ક્યારેક નાના કદ માટે થઈ ને, ક્યારેક પાડોશી ની મોટી ગાડી ને નામે, ક્યારેક પાડોશણ નાં ગળા માં શોભતા હાર ને લીધે, ક્યારેક ઓછાં માર્કસ ને લઈને, ક્યારેક અંગ્રેજી, પર્સનાલીટી, નોકરી કે ધંધા માં પડેલા માર ને લીધે...
આપણે આ બધામાંથી બહાર આવવાનું છે. આ જીવન છે તેને જીવવાનું જ છે.
     સમડી ની ઉંચી ઉડાન જોઇ ચકલી ડિપ્રેશન માં નથી આવી જતી,એ પોતાના માં મસ્ત રહે છે. પણ માણસ બીજા માણસ ની પ્રગતિ જોઈ ઘણી વાર ચિંતા માં પડી જાય છે. સરખામણી થી બચો અને ખુશ રહો.

ના કોઈ ની ઈર્ષ્યા, ના કોઈ સાથે હોડ
મારી પોતાની છે મંઝિલો, મારી પોતાની દોડ...

પરિસ્થિતિઓ ક્યારેય સમસ્યા હોતી નથી, તેઓ સમસ્યા બની જાય છે કારણ કે આપણને એ પરિસ્થિતિઓ સામે લડતાં નથી આવડતું.
હકારાત્મક બનો, સદાયે સ્મિત કરતા રહો...

(ઈન્ટરનેટ પરથી) 

શું તમે ભગવાન છો?

એક વાર કેટલાક સેલ્સમેનનું એક જૂથ શિકાગો ખાતે તેમના એક અગત્યના સેમિનારમાં હાજરી આપી પાછું ફરી રહ્યું હતું. સૌએ પોતપોતાના પરીવારજનોને પોતે જલ્દી પાછા ફરશે એવી ખાતરી આપી હતી જેથી હવે પછી તેમને મળવાની થોડી રજાઓમાં તેઓ પોતપોતાના એ પ્રિયજનો સાથે વધુમાં વધુ સમય ગાળી શકે.

તેઓ માર્ગમાં ટ્રાફીકની સમસ્યાને કારણે એરપોર્ટ પહોંચવામાં  મોડા પડ્યા હતાં. ઉતાવળે ભાગવામાં એક સેલ્સમેનની બ્રિફકેસ બેગ માર્ગમાં એક નાનકડી ખુલ્લી દુકાનના ટેબલ સાથે અથડાઈ જેના પર સફરજન એકની ઉપર એક પિરામીડ આકારે વેચાણ માટે પ્રદર્શનાર્થે ગોઠવેલા હતાં. બેગ સાથે અફળાતા બધાં સફરજન ચારે દિશામાં વેરાઈ ગયાં.એ સેલ્સમેને તો પાછું વળીને જોયું પણ નહિ કે તેણે કોને કેટલું નુકસાન પહોંચાડ્યું હતું અને તેની સાથેના બીજા સેલ્સમેન પણ ફ્લાઈટ ચૂકી ન જવાય એ ડરથી એક ક્ષણ પણ ત્યાં ઉભા રહ્યા નહિ સિવાય કે એક ભલો સંવેદનશીલ સેલ્સમેન.

આ સેલ્સમેન  ફ્લાઈટ ચૂકી જવાના ભય છતાં માણસાઈ ચૂક્યો નહિ. તે સફરજન વાળા પેલા સ્ટોલ કરતા થોડે આગળ ઉભો રહી ગયો અને તેણે એ સ્ટોલ સંભાળી રહેલી ગરીબડી છોકરી પ્રત્યે સંવેદના અનુભવી અને તેના અંતરાત્માએ તેને એ છોકરીને મદદ કરવા સૂચવ્યું. તેણે નક્કી કરી લીધું કે પોતે સેલ્સમેન મિત્રો સાથે ફ્લાઈટ પકડવા ઉતાવળે નહિ જાય.તેણે એક મિત્રને પોતાને ઘેર સંદેશો આપવા જણાવી દીધું કે પોતે પછીની જે ફ્લાઈટ પ્રાપ્ય હશે તે પકડી ઘેર આવશે.અને તે ફરી પાછો એ જગાએ આવ્યો જ્યાં સફરજન વેરાયેલા પડ્યા હતાં. તેને પાછા ફરવા બદલ મનમાં એક અજબની ખુશી થઈ રહી હતી. તેને જાણ થઈ કે એ સોળ વર્ષની યુવતિ સંપૂર્ણપણે અંધ હતી. તે ધીમે ધીમે રડી રહી હતી. તેના ગાલ પરથી હતાશા ભર્યા અશ્રુ વહી રહ્યા હતાં. તે પોતાના વેરાઈ ગયેલા ફળો સમેટવાનો નિરર્થક પ્રયાસ કરી રહી હતી. તેની આસપાસથી અનેક લોકો પસાર થઈ રહ્યા હતાં પણ કોઈ પાસે તેને મદદ કરવાની કે તેની પરવા કરવાની ફુરસદ નહોતી. પેલો ભલો સેલ્સમેન તેની બાજુમાં ઘૂંટણિયે બેસી ગયો અને તેણે એક પછી એક બધાં સફરજન ઉપાડી તેને ફરી પિરામીડ જેવા આકારમાં ટેબલ પર પ્રદર્શન માટે ગોઠવવા માંડ્યા.આમ કરતી વેળા તેણે જોયું કે કેટલાક ફળો દબાઈ ગયા હતાં,ચગદાઈ ગયા હતાં. એ તેણે બાજુમાં પડેલા એક ટોપલામાં અલગ રાખ્યાં. બધાં સફરજન લેવાઈ ગયા બાદ તેણે પોતાના પાકીટ માંથી વીસ ડોલરની નોટ કાઢી અને એ યુવતિના હાથમાં મૂકતા કહ્યું,"આ અમારાથી થયેલા નુકસાનની ભરપાઈ તરીકે વીસ ડોલર ને સ્વીકારી લો. તમે ઠીક તો છો ને?"

તેણે રડતા રડતા જ હકારમાં ડોકુ ધૂણાવ્યું.

સેલ્સમેને કહ્યું,"અમે તમારો દિવસ ખરાબ કરી નાખ્યો નહિ?અમને માફ કરી દેજો." આટલું કહી જેવું સેલ્સમેને ચાલવાનું શરૂ કર્યું કે યુવતિએ તેને સાદ પાડ્યો," સર..." તે થોભી ગયો અને પાછું વળી તેણે યુવતિની દ્રષ્ટીવિહીન આંખોમાં ડોકિયું કર્યું.

તે પૂછી રહી હતી,"શું તમે ભગવાન છો?"

તેણે વ્હાલથી યુવતિના માથે હાથ ફેરવ્યો અને પ્લેન ની હવે પછીની ફ્લાઈટ લેવા આગળ તરફ પ્રયાણ કર્યું.તેના મનમાં યુવતિના એ શબ્દો પડઘો પાડી રહ્યા હતાં," શું તમે ભગવાન છો?" તેનો આત્મા ઉંડા ચિંતનમાં ખોવાઈ ગયો હતો.

જીવવું એ રીતે જોઇએ કે લોકો તમારામાં ઇશ્વરને જુએ.પ્રેમ, સહાય અને માનવતાનો ધોધ વહાવીને પળો વિતાવવી જોઇએ.

ચાલો ઓછામાં ઓછા એક જણના જીવનમાં સકારાત્મક પરિવર્તન લાવવાનો સંલલ્પ કરીએ.

('ઈન્ટરનેટ પરથી')

શીખો "ફેંકી દેવાની" કળા

આજે એક નવી કળા શીખો "ફેંકી દેવાની" !

આજે પવિત્ર અને નિર્મળ રહેવાની શરત સ્વીકારો! કોઈ જ પ્રકારના કચરાને શરીરની અંદર નહિ ભરવાનો.

જ્યારે તમને કોઈક એવી વાત કહે જે તમને નાપસંદ હોય તો મોટે થી કે મનમાં માત્ર એટલું બોલો "હું આ નાપસંદ વાત ને ફેંકી દઉં છું."

કોઈ તમને ગાળ આપે તો કહો "હું આ ગાળ ફેંકી દઉં છું."

કોઈ તમને નિરાશ કરે તો કહો "હું આ નિરાશા ફેંકી દઉં છું.”

કોઈ તમને ઇજા પહોંચાડે તો કહો "હું આ ઇજાને ફેંકી દઉં છું."

કોઈ તમારી નિંદા કરે તો કહો "હું આ નિંદા ફેંકી દઉં છું.”

કોઈ તમારી સામે ઘાંટા પાડીને વાત કરે તો કહો "હું આ ઘાંટાને ફેંકી દઉં છું."

કોઈ તમારી પર ગુસ્સો કરે તો કહો "હું આ ગુસ્સાને ફેંકી દઉં છું.”

કોઈ તમારી સામે ભાવ ખાય તો કહો "હું આ તેના ભાવ ને ફેંકી દઉં છું.“

કોઈ તમને ખરાબ રીતે જુએ તો કહો "હું આ તેની બૂરી નજર ને ફેંકી દઉં છું.”

આજે એવા કોઈ જ તત્વને તમારી અંદર ન પ્રવેશવા દો જે તમારું ન હોય.

લોકોની કચરા ટોપલી બનશો નહિ જેમાં તેઓ પોતાનો ગુસ્સો,નફરત,ઇર્ષ્યા અને કડવાશ ઠાલવી શકે.

આ પ્રમાણે રોજ કરો અને જુઓ તમારા જીવનમાં કેવું પરિવર્તન આવે છે.

જ્યારે તમે "હું આ ફેંકી દઉં છું” બોલો ત્યારે મનમાં એવી કલ્પના કરો કે જાણે કેટલાક કિલોનું વજન તમારા શરીરમાંથી બહાર ફેંકાઈ રહ્યું છે.

પછી જુઓ કેટલી હળવાશ અનુભવાય છે દિવસને અંતે!

('ઈન્ટરનેટ પરથી')

“હું … છું” નો જાદુઇ મંત્ર

“હું … છું” એક જાદુઇ મંત્ર છે. તેની અગાધ શક્તિ વિશે તમે જાણશો તો અચંબામાં પડી જશો.

“હું … છું” આ બે શબ્દોની વચ્ચે તમે જે શબ્દ મૂકશો એ તમે કેવું જીવન જીવશો એ નક્કી કરશે. "હું તંદુરસ્ત છું.” “હું તાકાતવાન છું.” “હું નસીબદાર છું." કે પછી "હું મૂર્ખ છું.” “હું ધીમો છું.” “હું અનાકર્ષક છું." તમે “હું … છું” આ બે શબ્દોની વચ્ચે જે શબ્દ મૂકશો એ જ તમને સફળતા કે નિષ્ફળતા અપાવશે. આખો દિવસ “હું … છું” નો જાદુઈ મંત્ર તમારા મગજમાં કાર્યરત હોય છે .ઘણી વાર આપણે આ મંત્રની તાકાત આપણા જ વિરોધમાં વાપરીએ છીએ. આપણે જાણતા નથી એ આપણા ભવિષ્ય પર કેટલી મોટી અસર કરે છે.

આ મંત્રનું રહસ્ય કંઈક આ પ્રમાણે છે. તમે જે શબ્દ “હું … છું” આ બે શબ્દોની વચ્ચે મૂકશો તે તમને ગોતતું આવશે. સારી બાબત એ છે કે આ બે શબ્દોની વચ્ચે કયો શબ્દ મૂકવો તેની પસંદગી તમારા હાથમાં છે. જ્યારે તમે આખો દિવસ બોલશો "હું નસીબદાર છું", સદનસીબ તમને શોધતું આવે છે. જ્યારે તમે બોલો છો "હું ટેલેન્ટેડ છું", ટેલેન્ટ તમને શોધતી આવે છે. તમને કદાચ થોડું સારૂં ન લાગતુ હોય પણ તમે રટ્યા કરો " હું તંદુરસ્ત છું" તો તમારી તબિયત ચોક્કસ સુધરવા માંડશે. "હું તાકાતવાન છું" બોલશો તો તાકાત તમને સામેથી આવીને મળશે. આ બધી હકારાત્મક બાબતોને “હું … છું” નો મંત્ર આમંત્રણ આપે છે. રોજ સવારે ઉઠતાની સાથે જ બધી સારી બાબતોને આમંત્રણ આપો.

સવારે જાગતાની સાથે જ બોલો "હું નસીબદાર છું. હું તાકાતવાન છું. હું શિસ્તનો આગ્રહી છું. હું મારા લક્ષ્ય સિદ્ધ કરવા એકાગ્ર છું. હું સમૃદ્ધ છું." અને તમે જોશો કે ઇશ્વર તમારી આ આસ્થાને સત્યમાં પરિવર્તીત કરશે.

"હું ... છું" બ્રહ્માંડનો આકર્ષણનો નિયમ છે જે તમે ઇચ્છો તેને તમારી તરફ આકર્ષવાનો ગુણધર્મ ધરાવે છે.

('ઈન્ટરનેટ પરથી')

જીવન અને પડઘો

એક માણસ તેના દિકરા સાથે જંગલમાં ચાલી રહ્યો હતો.અચાનક છોકરો એક જગાએ પડી ગયો અને તેના મોઢામાંથી વેદનાભરી ચીસ નિકળી ગઈ "આ આ આ આ આહ...."

તેના આશ્ચર્ય સાથે તેણે સામેના પહાડ પરથી સામી તેના જેવી જ ચીસ સાંભળી. " આ આ આ આ આહ.... "

ઉત્સુકતાપૂર્વક તેણે ફરી મોટેથી બૂમ પાડી "તમે કોણ છો?"

પણ તેને સામો જવાબ મળ્યો "તમે કોણ છો?"

એને આ સાંભલી ગુસ્સો આવ્યો.તેણે મોટેથી કહ્યું "તમે કાયર છો!"

અને ફરી સામા અવાજે તેના કહ્યાનું પુનરાવર્તન કર્યું "તમે કાયર છો!"

હવે તે મૂંઝાયો અને તેણે પિતા સામે જોઈ પૂછ્યું "પપ્પા,આ શું ચાલી રહ્યું છે?"

માણસે પુત્રને જવાબ આપ્યો "બેટા,ધ્યાન આપ! કંઈક સારૂં બોલ."

છોકરાએ મોટેથી સાદ પાડી કહ્યું "તમે ખૂબ સારા છો!"

સામા અવાજે પણ મોટેથી કહ્યું "તમે ખૂબ સારા છો!"

માણસે પણ હવે પુત્રની રમતમાં જોડાઈ મોટેથી હાક મારી "તમે અદભૂત છો!"

સામેથી અવાજ આવ્યો "તમે અદભૂત છો!"

હવે માણસે પુત્રને પ્રેમથી સમજાવતા કહ્યું "બેટા,આને લોકો 'પડઘો' કહે છે.પણ ખરું જોતા એ જીવન જેવો જ છે! જીવન તમને એ જ પાછું આપે છે જે તમે આપો છો. જીવન તમારા કર્મોના અરીસા જેવું છે. જો તમે વધુ પ્રેમ આપશો તો વધુ પ્રેમ પામશો. જો તમને વધારે ઉદારતા જોઈતી હોય તો તમે વધારે ઉદારતા આપો. જો તમને સમજણ અને આદરની અપેક્ષા હોય તો સમજણ અને આદર આપો. જો તમે ઇચ્છતા હોવ કે લોકો તમારી સાથે ધીરજ રાખી અને માનપૂર્વક વર્તે તો ધૈર્ય દાખવો અને માન આપો. કુદરતનો આ નિયમ જીવનના દરેક ખૂણે, દરેક તબક્કે લાગુ પડે છે. જીવન હંમેશા તમને એ જ પાછું આપે છે જે તમે આપ્યું હોય. તમારૂં જીવન કોઈ એક સંયોગ નથી પણ એ તમારા જ કર્મોનું દર્પણ છે."

સ્વર્ગ અને નરક બીજે ક્યાંય નહિ પણ અહિ પૃથ્વી પર જ છે. આ હકીકત સમજી લો.

('ઈન્ટરનેટ પરથી')