એક પ્રેમકહાની

રજનીના લગ્ન સુહાસ સાથે થયા. લગ્ન બાદ રજનીની માતાએ તેને એક નવા બચત ખાતાની પાસ બુક આપી જે તેમણે રજની અને સુહાસના સંયુક્ત નામે ખોલાવ્યું હતું અને તેમાં રૂપિયા એક હજાર જમા કર્યાં હતાં.

તેમણે કહ્યું : "રજની, આ પાસ બુક લે.તેને તારા લગ્નજીવનની નોંધપોથીની જેમ સાચવજે. જ્યારે તારા નવા જીવનમાં કોઈક સુખદ અને યાદગાર એવી ઘટના બને ત્યારે આ ખાતામાં થોડા રૂપિયા જમા કરાવી તેની વિગત યાદીમાં લખાવજે. જેટલી એ ઘટના વધુ સારી હોય એટલા વધુ રૂપિયા તું આ ખાતામાં જમા કરાવજે. મેં ખાતામાં પહેલી રકમ તારા લગ્ન થયાં એવી નોંધ સાથે જમા કરાવી છે હવે આગળ તારે અને સુહાસે આ ખાતું સંભાળવાનું છે. વર્ષો બાદ ક્યારેક આ પાસબુક જોશે ત્યારે તને ખ્યાલ આવશે તે કેટલું સુખદ જીવન જીવ્યું છે અને કેટલી સુખદ અવિસ્મરણીય પળો માણી છે!"

રજનીએ નવા ઘરે આવ્યા બાદ આ ખાતાની વાત સુહાસને કરી. બંનેને આ ખાતાની યુક્તિ ઘણી સારી અને નવલ લાગી.તેઓ બંને હવે પછીની રકમનો હપ્તો ક્યારે જમા કરી શકાય એ ઘડીની આતૂરતા પૂર્વક રાહ જોવા માંડ્યા.

થોડા મહિનાઓ બાદ પાસબુકમાણ કંઈક આ પ્રમાણેની નોંધો પ્રવેશ પામી.

૧૪ ફેબ્રુ. : રૂ.૧૦૦૦,    રજની અને સુહાસનાં શુભ લગ્ન

૨૭ ફેબ્રુ. : રૂ.૫૦૦,        લગ્ન બાદ સુહાસના પ્રથમ જન્મદિવસની ઉજવણી

૧ માર્ચ : રૂ.૧૦૦૦,           રજનીનો પગાર વધ્યો

૨૦ માર્ચ : રૂ.૨૦૦૦,         અમારો પહેલો સહ-વિદેશ પ્રવાસ - લક્ષદ્વીપ

૧૫ એપ્રિલ : રૂ. ૧૦૦૦૦,  રજની પ્રેગનન્ટ થઈ!

૧ જૂન : રૂ. ૧૦૦૦,           સુહાસને પ્રમોશન મળ્યું

---

---

વગેરે વગેરે

પણ પછી તો સમય વહેતો ચાલ્યો તેમ તેમનાં લાગણીના પ્રવાહમાં ઓટ આવતી ગઈ અને તેઓ નાની નાની વાતોમાં ઝઘડવા માંડ્યા.તેમની વચ્ચે શબ્દોની આપલે ઓછી થવા માંડી.એક સમય તો એવો આવ્યો જ્યારે તેમને એકબીજા માટે લાગ્યું કે તેઓ જગતના સૌથી ખોટા પાત્ર સાથે પરણવાની ભૂલ કરી બેઠા. તેમની વચ્ચેના પ્રેમનું સ્થાન પસ્તાવાએ લઈ લીધું.

છેવટે એક દિવસ રજનીએ તેની માતાને કહ્યું:"મમ્મી હવે મારાથી સહન નથી થતું.અમે સહમતિથી છૂટા પડવાનું નક્કી કર્યું છે.મને સમજાતું નથી મેં સુહાસ જેવી વ્યક્તિ સાથે કઈ રીતે અને શા માટે લગ્ન કર્યાં?"

તેની મમ્મીએ કહ્યું:"તારી ખુશીમાં અમારી ખુશી છે બેટા. જો તારાથી વધુ સહન ન થતું હોય તો તારો છૂટા પડવાનો નિર્ણય પણ અમે વધાવી લઈશું. પણ તારે એ પહેલા એક કામ કરવાનું છે. તને મેં તારા લગ્ન સમયે પેલું ખાતુ ખોલાવી આપેલું એ યાદ છે? એ ખાતામાંથી બધાં રૂપિયા ઉપાડી લે અને તે વાપરી નાંખ. તારે તારા નિષ્ફળ લગ્નજીવનની એક પણ સ્મૃતિ બાકી રાખવી જોઇએ નહિ."

રજનીને થયું મમ્મીની વાત સાવ સાચી છે.તેણે તે ખાતુ બંધ કરી દેવાનો નિર્ણય કર્યો.તે બેન્કમાં ગઈ. પૈસા ઉપાડવા માટેની લાંબી કતારમાં ઉભી ઉભી  સમય પસાર કરવા તે પોતાની પાસબુકની નોંધો વાંચવા માંડી. તે એક પછી એક નોંધ વાંચતી ગઈ અને ભૂતકાળની મીઠી મધુરી સ્મૃતિઓ તેની આંખ સામે ફિલ્મ ના દ્રષ્યની જેમ તાજી થવા માંડી. તેનું મન અનેરી પ્રસન્નતાથી છવાઈ ગયું. તેની આંખના ખૂણા હર્ષાશ્રુથી ભીના બન્યાં.તે કતારમાં ઉભી ન રહી શકી અને દોડીને ઘેર આવી ગઈ.તેણે ઘરે આવી પાસબુક સુહાસને આપી અને તેણે છૂટાછેડા પહેલાં એ ખાતાની બધી રકમ તેને વાપરી નાંખવાની સૂચના આપી.

બીજા દિવસે સુહાસે રજનીને તે પાસબુક પાછી આપી.તેણે જોયું તો એમાં પાંચ હજાર રૂપિયાની નવી એન્ટ્રી હતી જેની સામે નોંધમાં લખ્યું હતું : એ દિવસ જ્યારે મને સમજાયું કે આ બધાં વિતેલા વર્ષોમાં આપણે કેટલો પ્રેમ એક બીજાને કર્યો હતો અને એક બીજાના જીવનમાં કેટલી ખુશી આણી હતી.

તેઓ એકબીજાને ભેટી પડ્યાં. બંને ની આંખોમાં અશ્રુઓ હતાં. ફરી તેમણે એ પાસબુક સાચવીને સલામત જગાએ મૂકી દીધી. ખબર છે છેવટે એ ખાતામાં કેટલી રકમ જમા થઈ હતી? એ જાણવું અગત્યનું નથી,અગત્યનું એ છે કે એ ખાતા અને તેની પાસબુકની નોંધોએ તેમની વચ્ચે પ્રેમ ફરી જીવિત કરી દીધો હતો અને પછી વર્ષો સુધી પ્રેમ અને સુખપૂર્વક એકમેક સાથે રહ્યાં.

જ્યારે તમે પડી જાવ છે ત્યારે એ જગાએ ન જુઓ જ્યાં તમે પડ્યા પણ જ્યાંથી તમારા પડવાની શરૂઆત થઈ હતી એ ધ્યાનમાં લો. જીવનમાં થયેલી ભૂલો સુધારી શકાય છે. પ્રેમમાં ફરી પડી શકાય છે…

('ઈન્ટરનેટ પરથી')

વેલેન્ટાઈન ડે સ્પેશિયલ : પ્રેમ… પ્રેમ… પ્રેમ…

હું તને પ્રેમ કરું છું એટલે હું તારો, તું જે વ્યક્તિ છે એ વ્યક્તિ તરીકે જ સ્વીકાર કરું છું અને હું તને બીજી કોઈ વ્યક્તિમાં બદલી નાંખવા ઇચ્છતો/ઇચ્છતી નથી.એનો અર્થ એવો પણ થાય કે હું તારામાં સંપૂર્ણતા ઝંખતો/ઝંખતી નથી અને તું પણ આમજ વર્તે એવી અપેક્ષા રાખું છું.
હું તને પ્રેમ કરું છું એટલે હું તને સદાય પ્રેમ કરતો/કરતી રહીશ અને ગમે તેવા કપરા સમયમાં પણ તારી પડખે ઉભો/ઉભી રહીશ.આનો અર્થ એ પણ થાય છે કે તું જ્યારે ખરાબ મૂડમાં હોય ત્યારે પણ કે તું ખૂબ થાકેલો/થાકેલી હોય અને હું જે કરવા ઇચ્છતો/ઇચ્છતી હોઉં તે ન કરે ત્યારે પણ હું તને પ્રેમ કરતો/કરતી રહીશ.પ્રેમમાં હોવાનો અર્થ ફક્ત ખૂશીમાં સાથે ઝૂમવું એવો નથી પણ મુશ્કેલીઓ અને દુ:ખોમાં પણ સાથે ઝઝૂમી તેમનો સહિયારો હિંમતપૂરક સામનો કરવો એ છે.
પ્રેમનો અર્થ એવો છે કે હું તારા છૂપામાં છૂપા રહસ્યો પણ જાણતો/જાણતી હોવા છતાં તારું મૂલ્યાંકન એના આધારે નથી કરતો/કરતી અને તારી પાસે પણ બદલામાં એવી જ અપેક્ષા રાખું છું.એનો અર્થ એવો પણ થાય છે કે હું તારા પ્રત્યે ખૂબ કાળજી ધરાવું છું અને તને એટલો પ્રેમ કરું છું કે કોઈ પણ ભોગે તારો સાથ છોડવા ઇચ્છતો/ઇચ્છતી નથી.એનો અર્થ એવો પણ થાય કે હું તારા વિષે વિચારું છું,તારા સ્વપ્નો જોઉં છું,સતત તારો સહવાસ ઝંખું છું અને આશા રાખું છું કે તું પણ મારા માટે આવી જ લાગણી અનુભવતો/અનુભવતી હોય...

હું તને ખૂબ પ્રેમ કરું છું...સદાય માટે....


#########################################################


જો તમે કોઈના પ્રેમમાં પડો અને તે કોઈ તમારા પ્રેમમાં પડે અને પછી જો પ્રેમ ચાલ્યો જાય તો તેને ફરી બોલાવવાની કોશિષ કરશો નહિં,કે એક બીજા પર દોષારોપણ પણ કરશો નહિં.તેનું કંઈક કારણ હોય છે અને તેનો કંઇક અર્થ થતો હોય છે.સમય તે અર્થ અને કારણને છતા કરશે.

યાદ રાખો તમે પ્રેમને પસંદ કરતા નથી.પ્રેમ તમને પસંદ કરે છે.તમે ફક્ત તે જ્યારે તમારા જીવનમાં આવે ત્યારે તેની સાથે સંકળાયેલા બધાં છૂપા રહસ્યો સહિત તેનો સ્વીકાર કરી શકો છો.જ્યાં સુધી તે છલકાઈ જાય ત્યાં સુધી તેને માણો અને તેને વહેંચો.તમારા જીવનમાં તેને લઈ આવનાર વ્યક્તિના જીવનને પણ તેનાથી ભરી દો.તમારી આસપાસ સર્વેને એ વહેંચો.અહિં જ પ્રેમીઓ ભૂલ કરી બેસતા હોય છે.અત્યાર સુધી લાંબા સમય સુધી પ્રેમથી દૂર રહયા હોવાથી તેઓ પ્રેમને એક જરૂરિયાત રૂપે જ જુએ છે.તેમને મતે તેમના હ્રદય ખાલી જગા જેવા છે જે તેઓ પ્રેમથી ભરી દેવા ઇચ્છે છે અને તેઓ પ્રેમને પોતનામાંથી ઉદભવી બહાર તરફ વહાવવાને બદલે બાહ્ય જગતથી તેમના તરફ વહેતો જોવા ઝંખે છે.

પ્રેમનો પ્રથમ સ્પર્શ તેમના સમગ્ર અસ્તિત્વને લાગણીની ભીનાશમાં તરબતર કરી દેનારો બની રહે છે પણ પછી જેમ જેમ તેમનો પ્રેમ ઠંડો પડતો જાય છે તેમ તેમ તેઓ પ્રેમને જરૂરિયાત તરીકે જોવા માંડે છે.તેઓ પોતે પ્રેમના ઉદગમસ્થાન બનવાને બદલે પ્રેમ સતત બહારના જગતમાંથી શોધતા ફરે છે.તેઓ પ્રેમ વિષેના એ રહસ્ય-સત્યને વિસરી જાય છે કે પ્રેમ એક એવી ભેટ છે જે આપવાથી વધે છે.

આ સતત યાદ રાખો અને તેને તમારા હ્રદયવગુ રાખો.પ્રેમનો પોતાનો સમય હોય છે,પોતાની આગવી ઋતુ હોય છે અને પ્રવેશવાના અને ગાયબ થઈ જવાના પોતાના આગવા કારણ હોય છે.તમે એને લાલચ આપી કે બળજબરીપૂર્વક કે બીજા કોઈ કારણસર પરાણે રોકી શકો નહિં.તમે ફક્ત એ આવે ત્યારે એને આલિંગન આપી શકો અને એ તમારી પાસે આવી જાય ત્યારબાદ તેને બીજાઓ સાથે વહેંચી શકો.પણ જો એ તમારા કે તમારા પ્રેમીજનના હ્રદયમાંથી વિદાય લેવાનું નક્કી કરે તો તમે કંઈ કરી શકો નહિં અને તમારે કંઈ કરવું પણ જોઈએ નહિં.

પ્રેમ સદાકાળ એક રહસ્ય જ બની રહ્યો છે અને રહસ્ય જ બની રહેશે.તમારા જીવનમાં એ થોડી ઘણી ક્ષણો માટે પણ આવ્યો એ વાતની ખુશી અનુભવો.

#########################################################
પ્રેમના લક્ષણોમાં શરીરમાં ધ્રુજારીના અનુભવથી માંડી તાવ સુધીના હોઈ શકે છે.પ્રેમ સતત બદલાતા થર્મોમીટર જેવો છે અને તે ટેનિસની રમત જેવો પણ છે.

પ્રેમ હ્રદયના જોશ,ઉમંગ અને ઉત્સાહ,કવિતાની ભાષા અને કાલ્પનિક રહસ્યકથાના રહસ્ય મિશ્રિત મનોરંજક નાટક જેવો હોય છે.
પ્રેમ એટલે ઉનાળાના કોઈક પ્રકાશિત દિવસે બે ઝાડ વચ્ચે બાંધેલા જાળીથી બનેલા હેમોક ઝૂલા પર ઝૂલતા ઝૂલતા એક્મેકના શ્વાચ્છોશ્વાસમાં ઓગળી જવું તે.
પ્રેમ લાંબુ ચાલનારી બેટરી જેવો છે જેને નિયત સમયે નિયમિત રીતે રીચાર્જ કરતા રહેવું પડે છે.
પ્રેમ તમારા પ્રિયપાત્ર સાથે સૂર્યોદય અને સૂર્યાસ્ત માણવામાં રહેલો છે.
પ્રેમ એટલે તમારા પ્રિય પાત્રને ભાવપૂર્વક કરેલું લાંબુ ભીનું ભીનું ચુંબન...
પ્રેમ એટલે હ્રદયના બદલાતા ભાવોનું તમે અંગત ડાયરીમાં કરેલું વિવરણ કે તમે લખેલા લાગણીની ભીનાશથી નીતરતા પ્રેમપત્રો કે તમારા પ્રિયપાત્રને તમે સમર્પિત કરેલી સંવેદનાભરી કવિતા...
ભરતી અને ઓટ આવે-જાય છે,પંખીઓ ઉડી જાય છે અને વસંતમાં પાછા ફરે છે, પણ પ્રેમની સ્મૃતિમાં લખાયેલું સાહિત્ય, આવતી કાલની આશાને જીવંત રાખે છે...

હ્રદયની સાચી લાગણીથી પ્રેરાઈને કરાયેલા હાવભાવ કે વર્તન, કોઈ હલકો - છૂપો આશય ધરાવતા હોતા નથી પણ તે સાચા પ્રેમની અભિવ્યક્તિ દર્શાવે છે...
પ્રેમ સરળતા અને સહજતાથી સ્મિત સાથે થતાં બે પાત્રો વચ્ચેના ચુંબનમાં છે.
પ્રેમ ભક્તિ અને ભાવથી લખાયેલી કવિતા છે.
('ઈન્ટરનેટ પરથી')