સૌથી સુખદ પળ...

રોજના જેવી જ એ સવાર હતી.
મારે ઓફીસે જવાનું હતું. આંગણામાં પડેલું છાપું ઉઠાવી મેં પહેલા અને છેલ્લા પાના પરના અગત્યના સમાચાર પર નજર નાંખી. છેલ્લા પાના પર મારી તસ્વીર જોઈ હું ચોંકી ઉઠ્યો. એ મારા અવસાનના સમાચાર હતા! મને એકદમ આઘાત લાગ્યો. ‘ હા! કાલે રાતે સુતો હતો, ત્યારે છાતીમાં થોડુંક દુખતું હતું ખરું. પણ પછી તો હું ઘસઘસાટ ઉંઘી ગયો હતો ને?‘
હું ઘડીયાળ તરફ નજર કરું છું. ‘અરે! દસ વાગી ગયા છે. મારી ચા ક્યાં છે? અરે! મારે ઓફીસ જવાનું કેટલું મોડું થઈ ગયું છે? મારો બોસ મારી ઉપર ખીજાશે. અરે! બધાં ક્યાં જતા રહ્યાં? મારા આ રુમની બહાર બધા કેમ ભેગા થયા લાગે છે?’
‘અરે.! આટલા બધા લોકો? ચોક્કસ કાંઈક ગરબડ લાગે છે. અરે.! કોઈક રડી રહ્યા છે. બીજા ચૂપચાપ ઉભા છે.’
‘અરે.! આ શું? મારું શરીર તો ફર્શ પર પડેલું છે. અરે! બધા સાંભળો હું તો અહીં છું, એ શરીરમાં નથી.’
‘ક્યાં કોઈ મને સાંભળે જ છે? અલ્યાઓ! હું મુઓ નથી, જુઓ આ રહ્યો.’
મેં બને એટલા જોરથી રાડ પાડી. પણ કોઈએ કશું સાંભળ્યું જ નહીં. કોઈને મારામાં રસ હોય તેમ ન લાગ્યું. બધા નિશ્ચેતન પડેલા મારા શરીર તરફ શોકથી જોઈ રહ્યા હતા. હું ફરી મારા સૂવાના ઓરડામાં ગયો.
મેં મારી જાતને પુછ્યું, ‘ શું હું ખરેખર મરી ગયો છું? અરે ! મારી પત્ની, મારું બાળક, મારાં મા બાપ, મારા મિત્રો – બધાં ક્યાં છે?’
હું બાજુના ઓરડામાં ગયો, બધા ત્યા રડી રહ્યાં હતાં; એકમેકને આશ્વાસન આપી રહ્યાં હતાં. મારી પત્ની સૌથી વધારે આક્રંદ કરી રહી હતી. તેને સૌથી વધારે દુખ થતું હોય તેમ જણાતું હતું. મારા નાનકડા પુત્રને આ શું થઈ રહ્યું છે, તેની કાંઈ સમજણ પડતી હોય તેમ ન લાગ્યું. પણ તેની મા રડી રહી હતી, એટલે તે પણ રડતો હોય તેમ લાગ્યું.
‘અરે ! મારા એ વહાલસોયાને હું બહુ જ પ્રેમ કરું છું, એમ કહ્યા વિના હું શી રીતે વિદાય લઈ શકું? અરે! મારી પત્નીએ મારી કેટલી બધી સંભાળ લીધી છે, તેમ કહ્યા વગર હું શી રીતે મરી શકું ? એક વાર તો એને હું કહી દઉં કે, હું તેને અત્યંત ચાહું છું. અરે! માબાપને એક વાર તો કહી દઉં, કે હું જે કાંઈ પણ હતો તે તેમના કારણે હતો. મારા મિત્રો વિના મેં જીવનમાં ઘણી ભૂલો કરી હોત; એમ એમને કહ્યા વિના, હું કઈ રીતે વિદાય લઉં? એ લોકોને મારી ખરેખર જરૂર હતી, ત્યારે હું તેમના કશા કામમાં આવ્યો નથી; એની દિલગીરી વ્યક્ત કર્યા વિના હું શી રીતે મરી શકું? જોને પેલા ખૂણામાં કોઈક છાનાં આંસુ સારી રહ્યો છે. અરે! એ તો એક જમાનામાં મારો જીગરી દોસ્ત હતો. સાવ નાકકડા મતભેદ અને ગેરસમજૂતીના કારણે અમે બે છૂટા પડ્યા; અને અમારા અહમના કારણે કદી ભેળા જ ન થયા.’
હું તેની પાસે ગયો અને મારો હાથ તેની તરફ લંબાવ્યો. મારે તેને મારી દિલગીરી સમજાવવી હતી. ફરી એના જીગરી બની જવું હતું. ‘મારા દોસ્ત! મને માફ કરી દે.’ :એમ કહેવું હતું.
‘અરેરે! એને મારો હાથ દેખાતો નથી? એ કેવો નિષ્ઠુર છે? હું આટલી સરળતાથી મારું હૈયું ઠાલવી રહ્યો છું; તો પણ એ હજી કેટલો અભિમાની છે? ખરેખર મારે આવા લોકો માટે લાગણીવશ ન થવું જોઈએ. પણ એક સેકન્ડ. કદાચ એને મારો હાથ નહીં દેખાતો હોય? ભૂલ્યો ! મારું શરીર તો બહારના ઓરડામાં પડેલું છે ને?ઓ ભલા ભગવાન! હું તો ખરેખર મરી જ ગયો છું. ‘
હું મારા શબની બાજુમાં બેઠો. મને બરાબરનું રડવું આવી ગયું.
‘અરે! મારા ભલા ભગવાન! મને બસ થોડાક દીવસ જીવતો કરી નાંખ. હું મારી પત્ની, મારાં માબાપ. મારા મિત્રો એ બધાંને એક વખત સમજાવી દઉં કે, કે એ બધાં મને કેટલાં વહાલાં છે? ‘
એટલામાં મારી પત્ની મારી બાજુમાં આવી પહોંચી. એ કેટલી સુંદર દેખાય છે?’
હું બરાડી ઉઠું છું ,’અલી એ! તું ખરેખર સુંદર છે.”
પણ એને ક્યાં મારા શબ્દો સંભળાય છે?
’મેં કદી એને એવા શબ્દો પ્રેમથી કહ્યા હતા ખરા? ‘
હું મોટી ચીસ પાડી દઉં છું,” અરે ભગવાન! મહેરબાની કરીને મને થોડોક સમય જીવતો કરી દે!‘
હું રડી પડું છું.
‘મને એક જ છેલ્લી તક આપી દે મારા વહાલા! હું મારા વહાલસોયા બાળકને ભેટી લઉં. મારી માને છેવટનું એક સ્મિત આપી દઉં. મારા બાપને મારા માટે ગૌરવ થાય એવા બે શબ્દ એમને કહી દઉં. મારા બધા મિત્રોને મેં જે કાંઈ નથી આપ્યું, એ માટે એમની માફી માંગી લઉં. મારા જીવનમાં હજી રહેવા માટે એમનો આભાર માની લઉં.’
અને મેં ઉંચે જોયું અને હું ચોધાર આંસુએ રડી પડ્યો. મેં ફરી એક પોક મૂકી. ‘અરે! પ્રભુ, મને છેલ્લી એક તક આપી દે,મારા વહાલા!’
……………..
અને મારી પત્નીએ મને હળવેથી જગાડ્યો અને વહાલથી કહ્યું ,” તમે ઉંઘમાં આમ કેમ રડી રહ્યા છો? તમને કંઈ થાય છે? તમને ખરાબ સપનું આવ્યું લાગે છે.”
‘અરે ! હું જીવું છું. મારી પત્ની મને સાંભળી શકે છે.'
મારા જીવનની આ સૌથી સુખદ પળ હતી.
કાલે જ મરણ આવવાનું હોય એમ આજે જીવીએ તો...!?

('ઈન્ટરનેટ પરથી')

કમ્પ્યુટરની જાતિ

એક સ્પેનીશ શિક્ષક તેના વર્ગમાં વિદ્યાર્થીઓને સમજાવી રહી હતી કે અંગ્રેજી ભાષા કરતા વિપરીત રીતે સ્પેનીશ ભાષામાં સંજ્ઞા(Noun)ની પણ નર કે નારી જાતિ હોય છે.
દા.ત. 'હાઉસ' (ઘર) નારીજાતિ ધરાવે છે : 'લા કાસા'
પણ 'પેન્સિલ' નર જાતિનો શબ્દ છે:'એલ લેપિઝ'.
એક વિદ્યાર્થી એ પૂછ્યું : કમ્પ્યુટરની જાતિ કઈ? જવાબ આપવાને બદલે શિક્ષકે વર્ગને છોકરાઓ અને છોકરીઓ એમ બે જૂથમાં વિભાજીત કરી નાંખ્યો અને છોકરીઓના જૂથને કમ્પ્યુટર નરજાતિનું ગણીએ તો તે માટેના ચાર સ્પષ્ટ કારણો અને છોકરાઓના જૂથને કમ્પ્યુટરને નારી જાતિનું ગણવાના ચાર સ્પષ્ટ કારણો લખવા જણાવ્યું.

છોકરાઓના જૂથે કમ્પ્યુટરને નારીજાતિનું ('લા કમ્પ્યુટાડોરા') ગણવા માટેના ચાર સબળ કારણો આપ્યા:
૧ તેમના રચયિતા સિવાય તેમની આંતરિક સંરચના કે તેમનું ઇન્ટરનલ લોજીક કોઈ સમજી શક્તું નથી!
૨ એક કમ્પ્યુટર બીજા કમ્પ્યુટર સાથે વાતચીત કરવા જે નેટીવ લેંગ્વેજ (ભાષા)નો ઉપયોગ કરે છે તે બીજુ કોઈ સમજી શકતુ નથી!
૩ નાના માં નાની ભૂલો પણ તેની લોંગ ટર્મ મેમરીમાં 'પોસિબલ લેટર રીટ્રીવલ' માટે (ભવિષ્યમાં ફરી પાછી જોઈ કે મેળવી શકાય એ માટે) સ્ટોર થઈ જાય છે!
૪ એક વાર તમે એક (કમ્પ્યુટર) સાથે પનારો પાડ્યો પછી તમારો અડધો પગાર તેની એક્સેસરીઝ ખરીદવામાં ચાલ્યો જાય છે!

હવે આવ્યો છોકરીઓના જૂથનો વારો.તેમણે કમ્પ્યુટરને શા માટે નરજાતિનું ('એલ કમ્પ્યુટાડોર') ગણવું જોઇએ એ માટેના ચાર મજબૂત કારણો આપ્યા:
૧ તેમની સાથે કંઈ પણ કરવું હોય તો પહેલા તેમને 'ટર્ન ઓન' કરવા પડે છે!
૨ તેમની પાસે ડેટા કે માહિતીનો ભંડાર હોવા છતા તેઓ પોતાની મેળે કંઈ કરી શક્તા નથી!
૩ તેઓ તમારા પ્રોબ્લેમ્સ દૂર કરવાનું મુખ્ય કામ બજાવવાની જગાએ મોટે ભાગે પોતે એક પ્રોબ્લેમ બની રહેતા હોય છે!
૪ જેવું તમે એક મોડેલ ખરીદી લો કે ટૂંક સમયમાં જ તમને પસ્તાવો થાય કે થોડી વધુ રાહ જોઈ હોત તો છે એના કરતા વધુ સારું મોડેલ મળી શક્યુ હોત!

તમે જ કહો કોણ જીતી ગયું હશે???

થોડું સામાન્ય જ્ઞાન વધારો!

ચાલો આજે ઇન્ટરનેટ કોર્નરમાં તમારું થોડું સામાન્ય જ્ઞાન ચકાસીએ. નીચે આપેલા પ્રશ્નોના પહેલા તમે પોતે જવાબ આપવાનો પ્રયત્ન કરી જુઓ. પછી ન આવડે તો જવાબ આપ્યા જ છે. જોઇ લો!અને તમારું સામાન્ય જ્ઞાન થોડું વધારી લો!

પ્રશ્ન ૧ ૧૯૮૪-૮૫ ની સાલ. ભારત અને પાકિસ્તાન વચ્ચે બીજી સિયાલકોટ ખાતે રમાઈ રહી હતી.ભારત વેંગસરકરના ૯૪ રનના અણનમ અને કુલ ૨૧૦/૩ ના સ્કોર સાથે રમી રહ્યું હતું અને અચાનક આ મેચ અટકાવી દેવામાં આવી હતી. શા માટે?
ઉત્તર ૧ એ મેચ રમાઈ રહી હતી તે જ સમયે ઇન્દિરા ગાંધીની હત્યાના સમાચાર ફેલાયા અને એ મેચ બંધ કરી દેવી પડી હતી.

પ્રશ્ન ૨ ADIDAS નું ફુલફોર્મ શું છે?
ઉત્તર ૨ All Day I Dream About Sports

પ્રશ્ન ૩ સ્ટાર ટી.વી. નેટવર્કમાં STAR નું ફુલ ફોર્મ શું છે?
ઉત્તર ૩ Satellite Television Asian Region

પ્રશ્ન ૪ ICICI નું ફુલફોર્મ શું છે?
ઉત્તર ૪ Industrial Credit and Investment Corporation Of India

પ્રશ્ન ૫ કયા એક માત્ર મહાનુભવે બે દેશોના રાષ્ટ્રગીત લખ્યા છે?
ઉત્તર ૫ રવિન્દ્રનાથ ટાગોર જેમણે ભારત અને બાંગ્લાદેશ (આમાર સોનાર - બાંગ્લા) એમ બે દેશના રાષ્ટ્રગીત લખ્યા છે.

પ્રશ્ન ૬ કયા ચાર ઉદગારો/શબ્દો પરથી 'GoodBye' શબ્દ બનાવાયો છે?
ઉત્તર ૬ God Be With You

પ્રશ્ન ૭ Agnes Gonxha Bojaxhiu ને આપણે સૌ કયા નામે ઓળખીએ છીએ?
ઉત્તર ૭ મધર ટેરેસા.

પ્રશ્ન ૮ આપણી સાથે જ બીજા કયા દેશનો આઝાદી દિન ૧૫મી ઓગષ્ટ છે?
ઉત્તર ૮ દક્ષિણ કોરિયા.

પ્રશ્ન ૯ જેમ્સ બોન્ડ સાથે નંબર ૦૦૭ શા માટે સંકળાયેલો છે?
ઉત્તર ૯ કારણ તે રશિયાનો ISD કોડ છે.

પ્રશ્ન ૧૦ સૌથી પહેલી વન ડે મેચમાં સૌ પ્રથમ દડા પર કોણ રમ્યું હતું?
ઉત્તર ૧૦ જેફ્રી બોયકોટ

પ્રશ્ન ૧૧ કયો ક્રિકેટર દક્ષિણ આફ્રિકા ઇન્ટરનેશનલ ક્રિકેટમાંથી બેન્ડ થયું હતું તે પહેલા દક્ષિણ આફ્રિકા માટે અને ત્યારબાદ ઝિમ્બાબવે માટે રમ્યો?
ઉત્તર ૧૧ જોન ટ્રાઈકોસ

પ્રશ્ન ૧૨ વેટિકન સિવાયનો કયો દેશ છે જે પોતાની બધી બાજુએથી ફક્ત એક જ દેશ દ્વારા ઘેરાયેલો છે?
ઉત્તર ૧૨ લેસોથો જે બધી બાજુએથી દક્ષિણ આફ્રિકાથી ઘેરાયેલો છે.

પ્રશ્ન ૧૩ કઈ એકમાત્ર રમત છે જે ડાબા હાથથી રમવા પર પ્રતિબંધ છે?
ઉત્તર ૧૩ પોલો

ભગવાનનું ભરતકામ

એક નાનકડી બાળકી તેની માતા પાસે રમી રહી હતી. માતા ભરત-ગૂંથણ કરી રહી હતી.બાળકી નીચે જમીન પર રમી રહી હતી જ્યારે માતા ખુરશી પર બેસી તેનું ભરતકામ કરી રહી હતી.બાળકીનું ધ્યાન રમતા રમતા ઉપર તરફ ગયું અને તેણે માતાના હાથમાં રહેલી ગોળ રીંગ વચ્ચે ભરાવેલા કપડા નીચે લટકતા વિવિધ રંગી દોરા જોયા.કૂતુહલવશ તેણે માતાને પૂછ્યું કે તે શું કરી રહી છે?માતાએ જવાબ આપ્યો:ભરતકામ.બાળકી એ માતાને કહ્યું કે નીચે થી પોતાને ફક્ત દોરાના ગૂંચળા દેખાઈ રહ્યા હતા.પેલી લાકડાની ગોળ રીંગ વચ્ચે ભરાવેલા કપડાના કડક ભાગનીચે બાળકીને જમીન પરથી ઉપર તરફ જોતા રંગબેરંગી દોરા સિવાય કંઈ જ દેખાતું નહોતુ.
માતા બાળકી તરફ પ્રેમથી હસી અને તેણે તેને સમજાવતા કહ્યું:"દિકરી તુ થોડી વાર રમવા જતી રહે. મારું આ ભરતકામ જેવું પતે એટલે તરત હું તને બોલાવી મારા ખોળામાં બેસાડીશ અને મારી બાજુએથી - અહિં ઉપર તરફથી આ ભરતકામ કરેલું કપડું કેવું દેખાય છે એ તને બતાવીશ."
બાળકી વિચારી રહી શા માટે તેની માતા આટલા બધા રંગબેરંગી દોરાઓ વારાફરતી સોયામાં ભેરવી પેલી લાકડાની ગોળ રીંગ વચ્ચે ભરતકામ માટે વાપરતી હશે?એવું તે કયું સુંદર ચિત્ર રચાવાનું હશે માતા તરફની બાજુએથી જોતા, જે પોતાના તરફની બાજુએથી તો ઝાંખા-ભડક રંગના દોરાઓનું ગૂંચળું જ માલૂમ પડતું હતું.આમ વિચાર કરતા કરતા બાળકી થોડે દૂર રમવા ચાલી ગઈ.
થોડી વારમાં તો તેની માતાએ તેને બોલાવી અને પ્રેમપૂર્વક પોતાના ઘૂંટણ પર બેસાડી.બાળકીએ જ્યારે માતાએ ભરતકામ દ્વારા બનાવેલું સુંદર સૂર્યાસ્તનું વિવિધરંગી ચિત્ર દોરાઓની વિશિષ્ટ ગૂંથણી દ્વારા તૈયાર થયેલું નિહાળ્યું ત્યારે તે આભી જ બની ગઈ!કેટલું મનમોહક ચિત્ર હતું એ!બે ઘડી તો તેને પોતાની આંખો પર વિશ્વાસ ન બેઠો કારણ નીચેની બાજુએથી તો એ દોરાઓના આડાઅવળા ગૂંચળાથી વિશેષ કંઈ જ નહોતું.
માતાએ બાળકીને કહ્યું,"દિકરી તને નીચેથી દેખાયું નહિં પણ ઉપરની બાજુએ કપડા પર રીંગની વચ્ચે સુંદર ચિત્ર પહેલેથી દોરેલું હતું.મેં તો ફક્ત તેને અનુસર્યું અને તેના ઉપર આ રંગીન દોરાઓ ગૂંથી આ ભાત તૈયાર કરી.હવે મારી બાજુએથી જોતા તને એની સુંદરતા અને અસલિયતનો ખ્યાલ આવ્યો.ખરું ને?"
ઘણી વાર આપણા જીવનમાં ઉપર તરફ જોઈ આપણે ભગવાનને પ્રશ્ન કરતા હોઈએ છીએ કે તે શું કરી રહ્યો છે? ત્યારે આપણે યાદ રાખવું જોઈએ કે તે ભરતકામ કરી રહ્યો હોય છે, આપણા જીવનરૂપી કપડા પર. આપણને તે આપણી બાજુએથી ભલે ગૂંચવાડા ભર્યું જણાય,ઘટનાઓ રૂપી દોરા અંધારિયા જણાય. પણ ત્યારે ભગવાન કહેતા હોય છે,"મારા બચ્ચા, જા અને તું તારું કાર્ય કર્યા કર.વખત આવ્યે એક દિવસ હું તને મારા ખોળામાં બેસાડી મારી બાજુએથી સુંદર ચિત્રનું દર્શન કરાવીશ." જરૂર છે ભગવાનનો આ જવાબ સમજવાની!

વેલેન્ટાઈન ડે સ્પેશિયલ

મારા પતિ વ્યવસયે એક એન્જિનિયર છે.તેમના શાંત-સ્થિર સ્વભાવને લીધે હું તેમને ખૂબ ચાહુ છું.તેમના પહોળા ખભા પર મારું માથુ ઢાળી જે ઉષ્માસભર લાગણીનો હું અનુભવ કરું છું તે મને બેહદ પ્રિય છે.
ત્રણ વર્ષનો સંવનનકાળ અને હવે બે વર્ષના લગ્નજીવન બાદ મને લાગે છે હવે હું થાકી ગઈ છું.મારી લાગણીના પ્રવાહમાં હવે મને ઓટ વર્તાવા લાગી છે.જે બધા કારણોને લીધે હું પહેલા તેમને અતિશય ચાહતી હતી એ જ કારણો હવે મારા તેમના પ્રત્યેના અણગમાના નિમિત્ત બન્યા છે.હું વારંવાર અસ્વસ્થ બની જાઉં છું. હું એક લાગણીશીલ સ્ત્રી છું અને જ્યારે મારા સંબંધો અને લાગણીઓની વાત આવે ત્યારે હું સંવેદનશીલ બની જાઉં છું. હું પ્રેમભરી સુખદ ક્ષણોને એવી રીતે ઝંખુ છું જેમ કોઈ નાનકડી બાળકી ચોકલેટ કે આઈસક્રીમની કામના કરે.જ્યારે મારા પતિનો સ્વભાવ આનાથી તદ્દન વિપરીત છે - લાગણીવિહિન ,સંવેદનારહિત.તેમના આવા સ્વભાવને લીધે સર્જાયેલા,પ્રેમભરી એ સુખદ ક્ષણોના અભાવે મારી પ્રેમની આકાંક્ષાઓને ચૂર ચૂર કરી અમારા દાંપત્યજીવનમાં મોટી તિરાડ સર્જી છે.
આખરે એક દિવસ મે તેમને મારો નિર્ણય જણાવવાનું નક્કી કર્યુ - છૂટાછેડાનો.
તેમણે આઘાત પામતા પૂછ્યું: કેમ?
મે જવાબ આપ્યો:હું ખૂબ થાકી ગઈ છું. જગતમાં દરેક વસ્તુના જવાબ નથી હોતા.
એ આખી રાત તે સૂઈ શક્યા નહિં,વ્યગ્રતાપૂર્વક ઉંડા ચિંતનમાં ખોવાયેલા રહ્યા અને એક જ રાતમાં તેમણે કેટલીયે સિગરેટો ફૂંકી નાંખી. મારી હતાશાની લાગણી ઓર વધી ગઈ.કેવા પુરૂષ સાથે હું સંબંધ બાંધી બેઠી જે પોતાની મૂંઝવણ પણ મારી સમક્ષ બરાબર રીતે વ્યક્ત કરી શક્તો નથી.બીજી શી આશા હું તેની પાસે રાખી શકું?
છેવટે તેમણે પૂછ્યું:તારો આ નિર્ણય બદલાવવા હું શું કરી શકું?
કોઈકે ખરું જ કહ્યું છે કે તમે બધું બદલી શકો છો પણ વ્યક્તિનો સ્વભાવ કે માણસનું વ્યક્તિત્વ બદલી શકતા નથી.હું તેમનામાંથી મારો વિશ્વાસ ગુમાવી બેઠી હતી.તેમની આંખોમાં ઉંડાણપૂર્વક જોતાં મેં કહ્યું:હું તમને એક પ્રશ્ન પૂછુ છું. જો તમે એનો યોગ્ય ઉત્તર આપી મને મનાવી લેશો તો હું મારા નિર્ણયની ફેરવિચારણા કરીશ.માનો કે કોઈ પર્વતની ટોચ પર એક સુંદર ફૂલ ઉગ્યું છે અને હું તમને એ મારા માટે તોડી લાવવા કહું છું.આપણે બંને જાણીએ છીએ કે જો તમે એ લેવા જવાનો પ્રયત્ન સુદ્ધા કરવા જાઓ તો તમારું મ્રુત્યુ નિશ્ચિત છે.આવી પરિસ્થિતીમાં તમે શું કરશો?શું તમે મારા માટે એ ફૂલ તોડી લાવવા જશો?"
તેમણે કહ્યું : હું આ પ્રશ્નનો ઉત્તર આવતી કાલે આપીશ.
તેમનો આવો ઉત્તર સાંભળી મારી આશાઓ પર પાણી ફરી વળ્યું.
હું બીજા દિવસે સવારે જાગી ત્યારે તે ઓફિસ માટે રવાના થઈ ચૂક્યા હતા. પણ મેં નોંધ્યુ કે તેઓ દરવાજા પાસે દૂધના ગ્લાસ નીચે એક પત્ર મારા માટે તેમના ગરબડિયા અક્ષરોમાં લખીને મૂકી ગયા હતા.મેં એ વાંચવા માંડ્યો. એમાં લખ્યું હતું : "વ્હાલી અમી, હું તારા માટે એ ફૂલ તોડવા નહિં જાઉં.પણ શા માટે એ મને સમજાવવાનો મોકો આપ."
પ્રથમ વાક્ય વાંચીને જ મારું હ્રદય તૂટી ગયું. પરંતુ મેં આગળ વાંચ્યું : જ્યારે તું કમ્પ્યુટર વાપરે છે અને હંમેશાની જેમ સોફ્ટવેર પ્રોગ્રામ્સમાં કંઈક ગડબડ કરી બેસે અને ત્યારબાદ કમ્પ્યુટરના સ્ક્રીન સામે રડવા બેસી જાય ત્યારે એ પ્રોગ્રામ્સ રીસ્ટોર કરવા અને તારી ગડબડ સુધારવા મારે મારી આંગળીઓ સાબૂત રાખવી છે. તું ઘણી વાર ઘરની ચાવી ભૂલી જાય છે અને પછી મારે ઘેર વહેલા પહોંચી જવું પડતું હોય છે તારું આપણા ઘરમાં સ્વાગત કરવા આવા પ્રસંગ માટે મારે મારા પગ બચાવી રાખવા છે.તને નવા નવા શહેરોમાં ફરવાનો શોખ છે પણ દર વખતે નવા શહેરમાં તું રસ્તો ભૂલી જતી હોય છે આવી વેળાએ ભવિષ્યમાં પણ તને રસ્તો બતાડવા મારે મારી આંખો સાબૂત રાખવી છે.તારા પગે ખાલી ચડી જતી હોય છે ત્યારે તને માલિશ કરી આપવા મારે મારી હથેળીઓ હેમખેમ રાખવી છે.
તું જ્યારે આપણાં બાળકની માતા બનવાની હોઇશ ત્યારે તારે ઘરમાં લાંબા સમય સુધી પૂરાઈ રહેવું પડશે એ વેળાએ તું બોર ન થઈ જાય એ માટે તને જોક્સ અને સરસ મજાની વાર્તાઓ કહી સંભળાવવા મારે મારું મોઢું સહી સલામત રાખવું છે.
આપણે સાથે ઘરડા થઈ જઈએ ત્યારે તારા નખ કાપી આપવા અને સફેદ થઈ ગયેલા વાળમાં કલપ કરી આપવા મારે હાજર રહેવું છે વ્હાલી.અને જ્યારે તને મનપસંદ એવા દરિયા કિનારે તું રેતી અને સુર્યાસ્તની મજા માણી રહી હોય ત્યારે તને નિરખ્યા કરવાની અને ત્યાં લાંબી લટાર મારતી વેળાએ તારો હાથ પકડવાની મારી દિલી તમન્ના છે.સુંદર ફૂલો, ઝરણા, પંખીઓ જેવા પ્રાક્રુતિક તત્વોની સુંદરતા નિહાળી તારા રતુમડા ચહેરા પર છવાઈ જતી લાલીની કુમાશ માણવાના મારા ઓરતા પણ હજી બાકી છે.
અને મારી પ્રિય પત્ની,જ્યાં સુધી તને મારાથી વધુ પ્રેમ કરી શકે એવી કોઈ વ્યક્તિ તારા જીવનમાં ન આવે ત્યાં સુધી પર્વત પરનું એ ફૂલ તોડી મારે મ્રુત્યુને વહાલુ કરવું નથી..."
પત્ર વાંચતા વાંચતા ક્યારે મારી આંખોમાંથી અશ્રુઓની ધારા વહેવા લાગી તેનો મને ખ્યાલ જ ન રહ્યો અને આંસુઓ પત્રની શાહી ધૂંધળી બનાવી રહ્યા,મેં વાંચવાનું ચાલુ રાખ્યું : "હવે જો તુ આ પત્ર વાંચી રહી હોય અને તને મારા ઉત્તરથી સંતોષ થયો હોય તો ઉભી થઈ બારણુ ખોલ, હું તારા પ્રિય બ્રેડ-બટર અને તાજું દૂધ લઈને દરવાજા પર ઉભો તારી રાહ જોઈ રહ્યો છું." મે દોડીને બારણું ખોલ્યું.તે બન્ને હાથમાં બ્રેડ-દૂધ વગેરે લઈ ઉત્સાહ અને ઉચાટ મિશ્રિત લાગણી ધરાવતા ચહેરા સાથે ઉભા હતા.
હવે મને ખાતરી થઈ ગઈ હતી કે તેમના જેટલો પ્રેમ મને કોઈ કરી શકે નહિં, અને મેં પેલા પર્વત પરનાં ફૂલને પડતું મૂકવાનો નિર્ણય લઈ લીધો છે.આવું જ થાય છે પ્રેમમાં અને જીવનમાં.જ્યારે આપણે પ્રેમથી ઘેરાયેલા હોઇએ છીએ ત્યારે રોમાંચની લાગણી ઓછી થતી જાય છે અને આપણે શાંતિ અને ઝાંખાપણાના સ્તરોની વચ્ચે છૂપાયેલા સાચા પ્રેમની અવગણના કરતા હોઈએ છીએ.
પ્રેમ કોઈપણ સ્વરૂપે પ્રદર્શિત થયા વગર રહેતો નથી, ઘણી વાર તો સાવ ક્ષુલ્લક અને સામાન્ય લાગે તેવી બાબતો દ્વારા.પણ એ ક્યારેય આદર્શ બની શકતો નથી.એ કદાચ સાવ કંટાળાજનક અને ઝાંખો હોઈ શકે છે.
પુષ્પો અને પ્રેમની ક્ષણો સંબંધની સપાટી પર તરતા તરતા તેને વધુ મજ્બૂત બનાવે છે.આ બધા વચ્ચે પ્રેમ રૂપી થાંભલો ઉભેલો હોય છે.આવું જ આપણું જીવન છે.પ્રેમ, ચર્ચા-વિચારણા વખતે વિજયી નિવડે છે.

હેપ્પી વેલેન્ટાઈન ડે...!!!

તમે તમારા કાળજા (કલેજા કે યક્રુત - Liver) ને કેટલું ચાહો છો?

જો તમે એને બરાબર રીતે ઓળખતા જ નહિં હોવ તો તમે એને કેવી રીતે ચાહી શકશો? તો ચાલો આજે ઇન્ટરનેટ કોર્નરમાં તમારા કાળજાને બરાબર ઓળખીએ, સમજીએ, જાણીએ - તેના દ્વારા જ!

કેમ છો? હું તમારું કાળજુ છું. હું તમને ૯ રીતે જણાવીશ કે હું તમને કઈ રીતે અને કેટલું ચાહું છું!

૧. હું તમારા શરીર માટે જરૂરી લોહતત્વ (Irons) અને ઘણાં બધાં જીવનપોષક તત્વો (Vitamins) અને બીજા ખનિજતત્વો(Minerals) નો તમારાં શરીરમાં સંગ્રહ કરું છું. મારા વગર શક્તિના અભાવે તમારું શરીર બિલકુલ કાર્ય કરી શકે નહિં!

૨. હું તમારા શરીરમાં ખોરાકના પાચન માટે જરૂરી પાચકરસો પેદા કરું છું. મારા વગર તમારા શરીરમાં ખાધેલો ખોરાક પચી શકે જ નહિં અને ઉત્સર્જન માટે જરૂરી કચરો પેદા જ થઈ શકે નહિં!

૩. હું તમારા શરીરમાં તમે સેવેલા ઝેરી રસાયણોની અસર નાબૂદ કરું છું જેમાં આલ્કોહોલ, બીયર, વાઈન (દારુ) અને ડોક્ટર્સ દ્વારા સૂચવાયેલી દવાઓ, તમે કરેલા નશીલા પદાર્થો (ડ્ર્ગ્સ) તેમજ બીજા અનધિકૃત પદાર્થોનો સમાવેશ થાય છે. જો હું ન હોઉં તો તમારી ખરાબ આદતો તમને તરત જ મૃત્યુને ઘાટે પહોંચાડી દે!

૪. જેમ બેટરીમાં ઉર્જાનો સંગ્રહ થાય છે તેમ તમારા શરીર માટે જરૂરી ઉર્જા જ્યાં સુધી વપરાઈ ન જાય ત્યાં સુધી હું શર્કરા (કાર્બોહાઈડ્રેટ્સ,ગ્લુકોઝ અને ફેટ્સ) સ્વરૂપે તમારા શરીરમાં સંગ્રહું છું. મારા વગર તમારા શરીરમાં શર્કરાનું પ્રમાણ એટલું ઘટી જાય કે તમે સીધા કોમામાં ચાલ્યા જાઓ!

૫. તમારા જન્મ પહેલાથી હું તમારાં શરીરમાં લોહી બનાવું છું જે તમારા શરીર અને જીવનને કાર્યરત રાખે છે. મારા વગર તમારું અસ્તિત્વ જ ન હોત!

૬. હું તમારા શરીરની વૃદ્ધિ અને તંદુરસ્તી માટે જરૂરી એવા પ્રોટીન્સનું ઉત્પાદન કરું છું. મારા વગર તમારો યોગ્ય વિકાસ જ ન થઈ શકે!

૭. તમારા શરીરમાં શ્વાસ દ્વારા દાખલ થયેલા પ્રદૂષિત ઝેરી પદાર્થો, ખરાબ હવા અને રસાયણોને હું તમારા શરીરમાંથી દૂર કરું છું. મારા વગર પ્રદૂષિત પદાર્થોનું ઝેર તમારા શરીરમાં ફેલાઈ જાય અને મારે કહેવાની જરૂર છે એનું પરિણામ શું આવે?

૮. અકસ્માતે તમે તમારા શરીરને ઇજા પહોંચાડી લોહી કાઢો છો ત્યારે હું એ લોહી ગંઠાઈ જાય એવા તત્વો બનાવું છું જેથી તમારું લોહી વધુ પ્રમાણમાં વહી જતું અટકી જાય. જો હું ન હોઉં તો તમારા શરીરમાંથી એક વાર લોહી વહેવાનું ચાલુ થાય તે અટકે જ નહિં અને તમે મૃત્યુ પામો!

૯. હું સતત તમારા શરીરમાં રોગ પેદા કરતા જીવાણુ-વિષાણુને તમારા શરીરમાં પ્રવેશતા કે ફેલાતા અટકાવી તમને રોગો સામે રક્ષણ પુરૂ પાડું છું.શરદીના વિષાણુ કે ફ્લુ જેવા તાવના જંતુ કે બીજા રોગ પેદા કરતા જીવાણુઓ સાથે લડી હું તેમનો નાશ કરું છું અથવા તેમને નબળા પાડી દઉં છું. મારી ગેરહાજરીમાં તમારે માણસ જાણે છે એટલા બધાં ચેપ કે રોગથી ઘેરાઈ બતકની જેમ બેસી રહેવું પડે!


...તો હું તમને આટલું બધું ચાહું છું. શું તમે પણ મને પ્રેમ કરો છો?

ચાલો હું જ તમને જણાવું કે તમે મને એટલે કે તમારા કાળજાને કઈ રીતે પ્રેમ કરી શકો છો?

- મને આલ્કોહોલ, બીયર કે વાઈન (દારુ) માં ડુબાડી દેશો નહિં! કેટલાક લોકો માટે તો એનું એક ટીપું પણ ખતરનાક અને મને ડરાવી મારવા માટે પુરતું છે.
- ગમે તે દવા કે ડ્રગ લેતા પહેલા સાવધ થઈ જાવ! દરેક દવા કે ડ્રગ એક પ્રકારનું રસાયણ છે અને ડોક્ટરની યોગ્ય સલાહ વગર તમે એનું સેવન કરશો તો એ તમારા શરીરમાં જઈ રાસયણિક પ્રક્રિયા દ્વારા એવા કોઈ ઝેરી પદાર્થો પેદા કરશે જે મારો મૃત્યુઘંટ વગાડી દેશે!
મારા પર અતિ આસાનીથી ઘસરકા પડી જાય છે અને 'CIRRHOSIS' નામે ઓળખાતા આ ઘસરકા કાયમી હોય છે.
દવાનું સેવન ઘણી વાર જરૂરી હોય છે પણ જ્યારે જરૂર ન હોય ત્યારે ખોટી ખોટી ગોળીઓનું સેવન એક અતિ ખોટી આદત છે અને જે મને બહુ ખરાબ રીતે નુકસાન પહોંચાડી શકે છે.
- એરોસોલ સ્પ્રે છાંટતી વેળા સાવધ થઈ જાઓ. યાદ રાખો તમે શ્વાસ દ્વારા જે ઝેરી પદાર્થો શરીરમાં ગ્રહણ કરો છો તેને મારે નકામા અને અસરરહિત બનાવવા પડે છે.આથી જ્યારે તમે એરોસોલ સ્પ્રે દ્વારા સફાઈ કરી રહ્યા હોવ ત્યારે ખાતરી કરી લો કે ખંડમાં હવાની અવરજવર સરળતાથી થઈ શકે એ માટે પુરતું વેન્ટિલેશન છે અથવા તમે પોતે યોગ્ય માસ્ક પહેરો.
આ જ હકીકત જંતુનાશક દવા કે સ્પ્રે, બીજા રાસાયણિક કે ઝેરી સ્પ્રે અને રંગ (Paint) સ્પ્રે અને બીજા દરેક પ્રકારનાં સ્પ્રે માટે તો બમણી લાગુ પડે છે!તમે શ્વાસ દ્વારા જે હવા શરીરમાં અંદર લો છો તેના પ્રત્યે સભાન થઈ જાઓ!
- તમારી ચામડીની ખાસ કાળજી રાખો.તમે ઝાડ-છોડ પર જે જંતુનાશક દવા છાંટો છો તે તમારી ચામડી પરથી મારા સુધી પહોંચી મારા કોષોનો નાશ કરી શકે છે.યાદ રાખો એ પણ મારા માટે હાનિકારક રસાયણ છે. તમારી ત્વચાને ઢાંકી રાખો - મોજા દ્વારા, લાંબી બાંય દ્વારા, ટોપી અને માસ્ક દ્વારા જ્યારે જ્યારે તમે જંતુનાશક દવાનો છંટકાવ કરતા હોવ કે પછી તેના સંપર્કમાં આવતા હોવ ત્યારે ત્યારે.
- ખૂબ વધારે ચરબીયુક્ત પદાર્થો ન ખાવ.હું જ તમારા શરીર માટે જરૂરી હોય એટલો કોલસ્ટ્રોલ બનાવું છું. મને પણ ક્યારેક વિરામ આપો!હંમેશા પોષણયુક્ત,સારો અને સંતુલિત આહાર ખાવ.જો તમે મારા માટે થઈને યોગ્ય આહાર ખાશો તો હું તમારું ખૂબ સારી રીતે ધ્યાન રાખીશ!

સાવધાન: હું તમને ક્યારેય ચેતવણી આપીશ નહિં, જ્યાં સુધી હું કે તમે મરણપથારીએ પહોંચી જવાની સ્થિતીમાં ન પહોંચી ગયા હોવ ત્યાં સુધી.

યાદ રાખો: ફરિયાદ કરવી મારો સ્વભાવ જ નથી.જો તમે મને અલ્કોહોલ, દારુ અને ડ્રગ્સના સેવનથી ઓવરલોડ કરી નાંખશો તો હું ફાટી જઈશ! આ તમારા મૃત્યુઘંટની નિશાની હશે.

મહેરબાની કરી મારી આટલી સલાહ માનો:
- તમારા ડોક્ટર પાસે મારી ચકાસણી કરાવી લો.
- લોહી પરિક્ષણ તપાસ દ્વારા જો કોઈ તકલીફ હશે તો તેનું નિદાન થઈ શકશે.
- જો હું પોચુ અને નરમ હોઉં તો એ સારી નિશાની છે.પણ જો હું સખત અને ખરબચડું હોઉં તો ભયજનક છે.
- જો તમારા ડોક્ટરને શંકા જાય તો અલ્ટ્રા સાઉન્ડ અને C.T. સ્કેન પરિક્ષણ દ્વારા સાચી પરિસ્થીતિનો તાગ મેળવી શકાય.
- મારું અને તમારું જીવન તમે મને કેવી રીતે સાચવો છો અને કેટલો પ્રેમ કરો છો તેના પર નિર્ભર છે.

તો હવે તમને ખ્યાલ આવી ગયો ને કે હું તમને કેટલો પ્રેમ કરું છું.

કૃપા કરી મને ખૂબ જતનપૂર્વક સાચવો. તમારો મૂક જોડીદાર અને સદાકાળ લવર - લીવર

પ્રાણીઓની શાળા

આજકાલ જુવાન વિદ્યાર્થીઓના આત્મહત્યાના કિસ્સાઓનું પ્રમાણ ચિંતાજનક રીતે વધી ગયું છે એવામાં માતાપિતાએ જરૂર છે તેમનાં સંતાનોની મન:સ્થિતીને સમજવાની અને તેમને ઈમોશનલ સપોર્ટ આપવાની. આજની આ સુંદર વાર્તા સરળ શૈલીમાં ઘણુંબધું કહી જાય છે આપણી આજની શાળા પધ્ધતિ વિષે અને કઈ રીતે તમારે તમારા બાળકમાં રહેલી ખૂબી ઓળખી તેને પ્રોત્સાહિત કરવાની જરૂર પર ભાર વિષે. વાંચો,માણો,શિખો અને વંચાવો.

એક વાર પ્રાણીઓની એક શાળા શરૂ થઈ.તેમણે એવો અભ્યાસક્રમ નક્કી કરવાનો હતો જે બધાં પ્રાણી-પક્ષીઓ માટે યોગ્ય હોય અને દરેકને સંતોષે. આથી તેમણે બધાએ ભેગા મળી ચાર વિષયો નક્કી કર્યા:ભાગવું,ચઢવું,ઉડવું અને તરવું.બધાંજ પ્રાણીઓ-પક્ષીઓએ બધાંજ વિષયોનો અભ્યાસ કરવો એમ નક્કી થયું.

બતક તરવામાં ખૂબ કુશળ હતું, શિક્ષક કરતાં પણ વધારે! તેને ભાગવા અને ઉડવામાં પાસ થવા જેટલાં માર્ક્સ મળ્યા પણ તે ચઢાણમાં સાવ ઢ સાબિત થયું.આથી તેને તરવાનો વિષય છોડી દઈ ચઢાણના વિષય પર વધુ ધ્યાન અપાવવાનું નક્કી થયું.
થોડા સમય બાદ એમ બન્યું કે બતક ચઢાણમાં તો ખાસ કંઈ પ્રગતિ સાધી શક્યું નહિં પણ તરવામાં ય સરેરાશ થઈ ગયું જે શાળાનાં નિયમો મુજબ તો ઠીક હતું પણ બતકને પોતાને આની ચિંતા થવા માંડી.

સમડીને તોફાની નિશાળીયાનું બિરૂદ મળ્યું.ચઢાણનાં વર્ગમાં તે હંમેશા બધાને પાછળ છોડી દેતી પણ તેની સૌથી ઉંચે પહોંચવાની રીત શાળાનાં નિયમો વિરુદ્ધ હતી.તેને હંમેશા શાળા છૂટી ગયા બાદ વર્ગમાં જ બેસી 'અંચી કરવી એ ગુનો છે' એમ પાંચસો વાર લખવાની સજા અપાતી.
આ સજાને કારણે તેના સૌથી ગમતા વિષય ચઢાણને તે સમય આપી શક્તી નહિં પણ શાળાના નિયમો અને વર્ગકામ તેમજ ઘરકામને તો અગ્રિમતા આપવી જ પડે ને?

રીંછ નાપાસ થયું કારણ શાળા એવા તારણ પર આવી કે શિયાળા દરમ્યાન તે અતિ આળસુ બની જાય છે.તેની કાર્યક્ષમતા ઉનાળા દરમ્યાન ટોચ પર રહેતી પણ ત્યારે તો શાળામાં વેકેશન હોય, ઉનાળાની લાંબી રજાઓનું!

ઝેબ્રા મોટેભાગે શાળામાં ગુટલી મારતું કારણ ઘોડાના બચ્ચાં તેને તેના શરીર પરના ચટ્ટાપટ્ટાને લીધે ખૂબ ચિઢવતાં.આથી ઝેબ્રાને ખૂબ દુ:ખ થતું અને તે મોટે ભાગે શાળા બહાર જ રહેતું.

કાંગારૂ દોડવામાં અવ્વલ નંબરે આવતું.પણ જ્યારથી શાળાના નિયમો મુજબ તેને બીજાં પ્રાણીઓની જેમજ ચારે પગ જમીન પર મૂકીને દોડવાનું કહેવામાં આવ્યું ત્યારથી તે ખૂબ દુ:ખી અને નિરાશ થઈ ગયું.

માછલીએ બોર થઈ જતાં શાળા છોડી દીધી કારણ તેના માટે તો ચારે વિષયો સરખાં જ હતાં - બોરિંગ અને નકામા! પણ કોઈ તેની સમસ્યા સમજી શક્યું નહિં કારણ કોઇએ ક્યારેય માછલી જોઇજ ન હતી!એ પાણીમાં જ રહેતી ને?


ખિસકોલીને ચઢવામાં 'A' ગ્રેડ મળ્યો.પણ ઉડવાના શિક્ષકે તેને ઝાડની ટોચની જગાએ જમીન પરથી ઉંચે ઉડવાની ફરજ પાડી.તેના પગે તો જમીન પરથી ઉડવાના વ્યર્થ પ્રયત્નોને કારણે સોજા ચઢી ગયાં અને તે બિમાર પડી ગઈ. હવે તો તેને ચઢવામાં 'C' અને દોડવામાં 'D' ગ્રેડ મળવા માંડ્યા.

મધમાખી બધા માટે માથાનો દુખાવો બની રહી આથી શિક્ષકોએ તેને ડોક્ટર ઘુવડ પાસે ચકાસણી માટે મોકલી આપી. ડોક્ટર ઘુવડ એવા તારણ પર આવ્યા કે મધમાખીની પાંખો ઉડવા માટે ખૂબ નાની હતી અને એ પણ તેના શરીર પર ખોટી જગાએ હતી.મધમાખીએ તો ડોક્ટર ઘુવડનો રીપોર્ટ જોયો સુદ્ધા નહિં અને એ ત્યાંથી ઉડી ગઈ!

બતક એવું બાળક છે જે ગણિતમાં પાવરઘું છે પણ અંગ્રેજીમાં સાવ નબળું અને જ્યારે તેના સહાધ્યાયીઓનાં ગણિતના વર્ગ ચાલુ હોય ત્યારે તેને અંગ્રેજી ભણવાની ફરજ પાડવામાં આવે છે. પરિણામે નથી એ સારો દેખાવ કરી શકતો અંગ્રેજીમાં અને તેના ગમતાં વિષય ગણિતમાં પણ નબળું પરિણામ મેળવવા માંડે છે.

સમડી એવા બાળક જેવી છે જેની કામ કરવાની પોતાની એક આગવી રીત છે પણ તે સર્વસામાન્ય ન હોઈ આ બાળક ચીડીયું અને તોફાની બારકસ બની જાય છે.જ્યારે એ કંઈ જ "ખોટું" ન કરે ત્યારે તેને કંઈ કરતું જ નથી અને તોફાની છે,જીદ્દી છે એમ ગણી સજા ફટકારવામાં આવે છે.

રીંછની ઓળખ કોને નહિં હોય? એ એવા બાળક જેવું છે જે ઇતર પ્રવૃત્તિઓમાં,રમતગમતમાં એક્કો છે પણ ભણવામાં મીંડુ!

ઝેબ્રાની સરખામણી કોઈ પણ ઠીંગણા, જાડિયા, અતિ ઉંચા કે આત્મવિશ્વાસમાં ઉણપ ધરાવનારા કોઈ પણ બાળક સાથે થઈ શકે જે શાળાજીવનમાં તદ્દન નિષ્ફળ સાબિત થાય છે.સમાજ આવા બાળકની સમસ્યા અને માનસિકતા સમજી શકતો નથી અને તેની ઠેકડી ઉડાડી તેનું જીવન નરકસમું બનાવી દે છે.

કાંગારૂ પોતાની આગવી વિશેષતા ખોઈ બેસી મહેનત કરવાનું છોડી દઈ હતોત્સાહી અને નિરાશ બાળક જેવું છે જેનું ભવિષ્ય અંધકારમય બની રહે છે કારણકે તેની કોઇએ સરાહના કરી નહિં અને તેની વિશિષ્ટ આવડત બદલ તેને બિરદાવ્યું નહિં અને તેને પોતાની રીતે આગળ વધવા દીધું નહિં.

માછલી એવા બાળક જેવી છે જેને ખાસ અલાયદા વર્ગમાં અલગ પ્રકારના શિક્ષણની જરૂર છે અને જે ક્યારેય સામાન્ય શાળાના સામાન્ય વર્ગમાં શિક્ષણ પ્રાપ્ત કરી શકે નહિં.

ખિસકોલી બતકની જેમ સમાધાન ન કરી શકવાને કારણે નિષ્ફળ સાબિત થનાર બાળક સમાન છે.

અને મધમાખી એવું બાળક છે જે માને છે શાળા ક્યારેય તેના માટે સર્જાઈ જ નથી! અને આમ છતાં,બધી અડચણોને અવરોધી તેના માતાપિતાના સહયોગથી બીજા બધા તેને નકામો ગણતા હોવા છતાં કાઠું કાઢે છે!

મેં ઘણા મધમાખી જેવા બાળકો જોયા છે.

તમારું બાળક બીજા બાળકોથી જુદું અને ખાસ આવડત, આગવું વ્યક્તિત્વ અને ખાસ ગુણો ધરાવતું ઇશ્વરની તમને એક અજોડ ભેટ સમાન છે.

કેટલાક બાળકો વિચક્ષણ બુદ્ધિપ્રતિભા ધરાવનારા હોય છે તો કેટલાક ખૂબ લાગણીશીલ હોય છે તો કેટલાક વળી ઇશ્વરે બક્ષેલી કોઈ ખાસ ખૂબી સાથે જન્મ્યા હોય છે (જેને આપણે 'ગિફ્ટેડ' ગણીએ છીએ). પણ દરેક બાળક પાસે પોતાની આગવી કોઈક વિશેષતા હોય જ છે.

ફક્ત એટલું યાદ રાખો કે કોઈ બાળક જીવનની માર્ગદર્શિકા સાથે જન્મતુ નથી. અસરકારક માતાપિતા હંમેશા પોતે શિખતા રહી,અભ્યાસ કરતા રહી પોતાના બાળકની ખાસિયત ઓળખી લઈ તેનું યોગ્ય અને વ્યવસ્થિત ચારિત્ર્યઘડતર કરતાં રહે છે.

દરેક બાળક આંગળીઓની જુદીજુદી છાપને જેમ જ એક્બીજાથી તદ્દન નોખું હોય છે, અપ્રતિમ સૌંદર્ય ધરાવતા ઝળહળતા હીરા સમાન.

મહેરબાની કરી તમારા બાળકની હાલત આ વાર્તામાંના કાંગારૂ કે બીજા કોઈ પ્રાણી જેવી થવા ન દેતા.

સારા માતાપિતા બનવાની પ્રેરણાત્મક ટીપ્સ મેળવવા તમે આ વેબ-એડ્રેસ પર જઈ તમારું ઇ-મેલ એડ્રેસ નોંધાવી શકો છો:
http://www.raisingsmallsouls.com/wp-content/themes/179/form.html